گود سبور- الرباط//

خرجو المنتخب الوطني المغربي والمنتخب السنغالي معادلين من الشوط الاول ديال ماتش فينال كاس افريقيا “المغرب2025”، اللي بادي بين المنتخبين فهاد اللحظات من مساء اليوم الاحد فتيران مولاي عبد الله بالرباط.

الشوط الاول بين المنتخبين المغربي والسنغالي كان متوازن، مع صراع على وسط التيران، وكل منتخب حاول يشد الكورة لأطول وقت ممكن مع البحث على شي هفوة فدافع الآخر، والمنتخب اللي كان فيهم كاتمشي له الكورة كان فالبلاصة كايدير لبلوك باش يسد فالبلاصة اللي مشات له فيها الكورة باش الخصم ما يربحش مسافة نحو المرمى ديالو.

الفرص ما كانوش بزاف من الطرفين فالشوط الاول، باستثناء فرصة لكل منتخب، أولها واللي كانت خطيرة ديال السنغال فالدقيقة 38 بواسطة اليمان ندياي واللي لقى راسو فاص أفاص مع ياسين بونو ولكن الگول المغربي تدخل وعتق المرمى ديال السبوعا من هدف حقيقي، ومن بعدها غادي يرد المنتخب المغربي فالدقيقة 40 بكورة ديال عبد الصمد الزلزولي اللي سونطرا لابال ودازت من قدام ايوب الكعبي والمهاجم المغاربة وما لقاتش اللي ماركيها على السنغال، مع العلم ان الديشي كاين فالوسط الدفاعي ديال المنتخب المغربي وهذا الشي خاصو يتصلح فالشوط الثاني حيث السنغاليين قطعو شي كواري كانو يستغلوهم احسن كون عرفو لهم.