كود -وكالات//

نهار 22 أبريل 2026 بدا كيتعرض فالسينما فيلم “Michael” لي من إخراج أنطوان فوكوا، وبميزانية وصلات حتى ل 155 مليون دولار، باش يعاود السيرة الفنية ديال مايكل جاكسون، من البدايات ديالو مع فرقة Jackson 5 حتى القمة ديال الشهرة العالمية.

الفيلم كيعاود المسار الفني ديال مايكل من البدايات ديالو مع فرقة Jackson 5 حتى الشهرة العالمية، ولكن تعرض لانتقادات حيث ميك بزاف هلى الجوانب الحساسة فحياتو ومن  بين أهم الحوايج اللي ما تطرقاتش ليها، كاينين اتهامات الاعتداء الجنسي على دراري صغار  اللي لاحقاتو فالتسعينات، واللي كانت ممكن تكون جزء مهم فالقصة.

و حسب تقارير إعلامية، هاد الحذف جا بسبب اتفاق قانوني قديم كيمنع ذكر واحد من المشتكين فالفيلم، وهاد الشي خلا صناعو يبدلو النهاية ويصورو مشاهد جداد باش يبقا التركيز على النجاح الفني وحدو.

حتى الطفولة ديال مايكل، اللي كانت فيها معاناة وعنف من طرف الأب ديالو، ما تعطاتش ليها أهمية كبيرة، الشي اللي خلا بعض النقاد يقولو باللي الفيلم سطحي بزاف.

من جهة أخرى أفراد العائلة ما كانوش حاضرين فالفيلم، بحال جانيت جاكسون، وحتى باريس جاكسون لي انتقدات الفلم وقالت باللي فيه مبالغة وتحريف لبعض الحقائق. فالأخير، الفيلم باين موجه كثر باش يرضي المعجبين ديال “ملك البوب” كثر من أنه يقدم صورة كاملة على حياتو.