وكالات//

فهاد الشهر، اللي خرجو فيه بزاف ديال أفلام الإثارة والتشويق، تصدّر فيلم الرعب الجديد “Weapons” للمخرج زاك كريغر القاعات السينمائية فمريكان فـعطلة نهاية الأسبوع اللولة، و جاب 42.5 مليون دولار من 3202 قاعة عرض. وعلى المستوى العالمي، تجاوزات المداخيل ديالو 70 مليون دولار.

الفيلم، اللي تابع لشركة وارنر براذرز بيكتشرز، ولا سابع فيلم يفتتح فالمرتبة الأولى هاد العام، وسادس فيلم ورا بعضو من نفس الشركة كيحقّق أكثر من 40 مليون دولار فالسوق المحلي.

فالمركز الثاني، جا فيلم “Freakier Friday” من إنتاج ديزني، وهو الجزء الثاني من السلسلة الكلاسيكية، وجاب 29 مليون دولار من 3975 قاعة عرض فمريكان الشمالية. هاد الفيلم شهد رجوع النجمتين ليندسي لوهان وجيمي لي كورتيس، وفيه مشاهد بين الأم وبنتها، وحتى بنت لوهان اللي فسن المراهقة.

بول ديرغارابديان، محلل كبير فشركة كومسكور، قال باللي النجاح ديال الفيلمين راجع للحملات التسويقية اللي ولات فايرال على السوشيال ميديا، وهادشي اللي جبد جمهور متنوع خلال الويكاند.