كود سبور//

أكد الناخب الوطني خورخي فيلدا مدرب المنتخب الوطني المغربي للسيدات، أن الجامعة الملكية المغربية لكرة القدم ملي بغات تعاقد معاه باش يدرب اللبؤات، كانت باغيا مدرب بطل عالم، وبحكم أنه هو توج مع إسبانيا الصيف الماضي بالمونديال سناو معه وفق برنامج ومشروع مسطر.

وكشف الإسباني خورخي فيلدا فتصريح لجريدة “موندو ديبورتيفو” وقال: “وقع كلشي بالزربة وكان كلشي إيجابي حيث ملي وصلت للمغرب دغيا تشكل الطاقم التقني وراني فرحان، راه لقيت جامعة كورة ملتزمة بالكورة النسوية وحتى اللاعبات استقبلوني ورحبو بيا، وبدينا بالرباح”.

وزاد وضح مدرب اللبؤات: “اللاعبات شغوفات بالكورة، والمرافق اللي عند المغاربة (مركز محمد السادس لكرة القدم) هي الأفضل فالعالم، بالإضافة إلى حب الجماهير للكورة النسوية وحبهم للمنتخب الوطني المغربي.

وبخصوص الطريقة اللي جا بها التعاقد معه، قال الإسباني خورخي فيلدا مدرب المنتخب المغربي للسيدات: “داز كلشي دغيا وباش نكون صريح اتصل بيا المدير الرياضي وإدارة كرة القدم النسوية واقترحو علي باش نكون مدرب، وما كنتش أن المرشح الوحيد لهاد البوسط حيث كانت واحد لاليست مصغرة، ولكن الموافقة ديالي حينها كتعني أنني هو الخيار الاول بالنسبة لهم”.

وزاد وضح الناخب الوطني: “ملي مشيت المغرب دواو معيا فكلشي وشرحو ليا شروطهم، وأكد ليا أنهم غيوفرو ليا جميع الشروط باش نخدم وبلي كنت هو الخيار الأول بالنسبة لهم، حيث بغاو يعتامدو على مدرب بطل العالم”.