كود سبور//

أكد الإسباني خوخي فيلدا مدرب المنتخب الوطني المغربي أنه باقي مع اللبؤات، واخا ما قدروش يتأهلو لأولمبياد باريس 2024، وأن الهدف ديالو دابا هو يربح كوب دافريك للعيالات مع المغرب.

وهضر خورخي فيلدا مدرب المنتخب المغربي بعد خسارة باراج أولمبياد باريس ضد منتخب زامبيا بنتيجة 2 لزيرو فالروتور، وقال: “أنا مزال مع المنتخب المغربي، وغنخدمو دابا على المستقبل وماشي نهاية العالم حيث ما تأهلناش لأولمبياد باريس وهادي هي الكورة، والهدف ديالي دابا هو نربح كاس افريقيا مع المنتخب المغربي”.

وكان المنتخب الوطني المغربي لكرة القدم النسوية قريب يحقق انجاز تاريخي بالتأهل إلى أولمبياد باريس، ولكن ما قدرش يحافظ على رباح الالي ديال الباراح بجوج لوحد على زامبيا فبلادها وخسر فالروتور فالرباط بنتيجة 2 لزيرو وتقصاو اللبؤات.

وعبر فيلدا على الافتخار ديالو بلاعبات ليكيب ناسيونال واخا ما قدروش يتأهلو، وأكد انهم دارو كلشي اللي فجهدهم وهادي هي الكورة.
وقال خورخي فيلدا: “أنا فخور باللاعبات ديالي حيت دارو اللي عليهم، جاتنا فرص كثار فالماتش ضد زامبيا ولكن ما قدرناش نماركيو وهادي هي الكورة”.
وكمل خورخي فيلدا: “المنتخب الزامبي قوي وعندو لاعبات واعرين، وحنا درنا اخطاء، وغنخدمو على ريوسنا باش نطورو مستوانا فالمستقبل”.