الرئيسية > آش واقع > فيضانات كازا. وقفة احتحاجية لفيدرالية اليسار كتحمل فيها المسؤولية لعمدة كازا
13/01/2021 20:20 آش واقع

فيضانات كازا. وقفة احتحاجية لفيدرالية اليسار كتحمل فيها المسؤولية لعمدة كازا

فيضانات كازا. وقفة احتحاجية لفيدرالية اليسار كتحمل فيها المسؤولية لعمدة كازا

كود كازا//

شاركات فيدرالية اليسار الديمقراطي، هي ومجموعة من الجمعيات، فوقفة قدام مجلس مدينة كازا، للاحتجاج على الخسائر البشرية والمادية اللي تسببات فيها الفيضانات والتساقطات القوية اللي عرفاتها المدينة فالسيمانة اللي فاتت.

وحضر لهذ الوقفة، اللي كانت اليوم الأربعاء قدام جماعة كازا، محمد بجاجة، منسق فيدرالية اليسار فكازا، وجمعيات من قبيل جمعية التحدي للمساواة والمواطنة، وجمعية الصفا للتنمية والمواطنة، لكن فالمقابل غابو فيها قادة الأحزاب المكونة للفيدرالية.

وحملو المحتجين العمدة عبد العزيز العماري والمنتخبين فالمجلس المسؤولية لهذشي اللي وقع، واتهموهم بضعف التسيير، وأنهم ماكيقوموش بالعمل ديالهم على أكمل وجه، حتى خلاو الديور تطيح على رؤوس ماليها، والفيضانات تتكون بسبب ضعف البنية التحتية.

وطالبو المحتجين، اللي تقدر عددهم بالمئات، بربط المسؤولية بالمحاسبة باش بحال هذ الأمور ما تتكررش، ورفعو شعارات من قبيل: “باراكا من التماطل والمجلس هو المسؤول”، و”هز كَدم وحط كَدم والمجلس عامر درهم”، و”سوا اليوم سوا الغدا المحاسبة ولا بدا” و”كفانا شعارات والهروب من المسؤولية”.

والمجلس كيستعد لعقد دورة استثنائية، يوم الجمعة 15 يناير 2021، بناء على طلب الوالي، لتدارس القضايا والتطورات اللي عرفاتها المدينة، لا سيما الفيضانات اللي تسببات فيها التساقطات المطرية اللي عرفاتها كازا فالسيمانة اللي فاتت، مع التحديد المسؤوليات.

موضوعات أخرى

21/01/2021 18:20

المصايب ديال الحريكَ مازال متواصلة.. جبدو 2 جثث ديال حراگة فيهم واحدة ديال بنت غرقات لفلوكة ديالهم البارح فسواحل الداخلة