كود كلميمة//
تسببت الأمطار الأخيرة فالجنوب الشرقي، ف كشف الفضايح ديال التدبير الجماعي وتورط السلطات في عدد من المشاريع المغشوشة، واللي زاد فضحها صاحب أغنية “المدير الفلاحي.. الحديد الرقيقة”، واللي انتشر فيديو ديالو بشكل واسع.
وعلى غرار باقي مدن وأقاليم الجنوب الشرقي، كتعيش بلدة كلميمة احتقان كبير واستمرار الاحتجاجات طيلة الأيام الماضية، لكن المفاجأة هي أن أعضاء فالمعارضة والأغلبية بمجلس كلميمة حتى هوما كيشاركو فهاد الوقفات إلى جانب الحقوقيين والفعاليات المدنية.
تراكم مشاكل تهيئة الأزقة والخروقات الجسيمة في مجال التعمير، وغيرها من الفضايح، اللي كولشي مسؤول عليها، من المقدم للقايد للباشا للعامل للوالي دون نسيان الوكالة الحضرية والمنتخبين، هادشي تفضح كثر مع الفيضانات الأخيرة.
عكس مدينة الرباط، للي كيتم تهيئتها بشكل سريع، واللي واقف على الشغل مزيان الوالي محمد اليعقوبي، اللي خدام بنهار وبليل (كيزعج عدد من السكان وهادشي مخالف للقانون)، فراه كلميمة وباقي المدن غاديا بسرعة السلحفاة فالتنمية.
وكتعرف أحياء جماعة كلميمة تخبط كبير وفوضى مور التساقطات بحيث كثرات الأوحال فعدة شوارع خصوصا شارع الحسن الثاني وعدد من الأزقة.
ومع الفيضانات وزيد عليها استمرار سنوات من التهميش لهاد المناطق، كيطلعو شي منتخبين همهم الوحيد الصفقات لذلك كل مرة كنسمع هذا تشد ولاخر هرب، فالمقابل السلطات الولائية مدايراش خدمتها كما يجب.
المدينة لي فيها قصور تاريخية كتعاني تهميش كبير، خصها اليوم زلزال، يبدا بمفتشية وزارة الداخلية تجي تراقب صفقات التهيئة وغيرها من الصفقات.
