وكالات//

فيديو داير فمواقع التواصل الاجتماعي خلق موجة ديال الجدل، من بعدما بانَت فيه مرا كتطلب من عامل توصيل يدخل ليها طلب ديال الماكلة حتى لمقبرة، وفوقت متأخر من الليل، فمشهد اللي بزاف د الناس وصفوه بالغريب وكيقلّق.

الفيديو كيبان فيه عامل التوصيل كيتاصل بالزبونة باش يقول ليها راه وصل للمكان، وهي بكل هدوء كتطلب منّو يدخل لداخل المقبرة، وكتطمّنو وكتقولو “راه كلشي بخير”. ولكن منين فهم العامل فين راه، رفض يدخل، وعبّر على القلق والخوف ديالو، وطلب منها تسلّم الطلب عند الباب ولا تلغي الطلب.
واللي زاد خلّى الموقف أغرب، هو منين قالت ليه المرا بأنها “كتحتافل مع صحابها داخل المقبرة”، الشي اللي خلاه يتساءل باستغراب واش الناس ولات كتطلب الماكلة حتى لهد البلايص.