كود سبور//

كايبان ان مدينة الدار البيضاء تحگرت فـ كاس افريقيا لكرة القدم، حيث تعطاوها ماتشات ومنتخبات ما عندهمش شعبية كبيرة.

مركب محمد الخامس بالدار البيضاء، ملعوب فيه فهاد اللحظات من اليوم الاثنين ماتش مالي ضد زامبيا وهو ثاني  ثاني ماتش فـ كاس افريقيا بعد ماتش الافتتاح، وهي مباراة فـ الگروب ديال المنتخب المغربي، ولكن راه ما تسوق له حد وما جاش له الجمهور.

طبعا الجمهور عندو اكراه ديال الوقت حيث الماتش بدا مع 3 ديال العشية وهاد الوقت هو وقت ديال القراية ولا الخدمة، ولكن راه حتى المنتخبين اللي لاعبين ما عندهمش شعبية وهذا الشي ما غاديش يشجع الجماهير المحايدة باش تجي للتيران تتفرج، ومع الأسف هذا الشي راه مخلي ستاد دونور كايصفر.

للإشارة فـ الرباط فيها 4 ديال التيرانات فيهم ماتشات كاس افريقيا، مقابل ملعب بكازا وملعب بطنجة وملعب بفاس وملعب بأكادير وملعب بمراكش وحتى المنتخبات اللي عندهم شعبية بحال تونس والجزائر ومصر والكوت ديفوار والسنغال ما تعطاهمش يلعبو فـ كازا.

https://www.facebook.com/share/v/17bwNZ6XMN/?mibextid=wwXIfr