وكالات//

جنيفر لوبيز (56 عام) وراجلها السابق بن أفليك (53 عام) جبدو الانتباه فواحد الظهور مفاجئ وحميمي على الريد كاربت فالعرض الأول ديال الفيلم ديالهم الجديد Kiss of the Spider Woman اللي دار فـ نيويورك نهار الإثنين.

وبان الثنائي، اللي طلقو رسمياً فبداية هاد العام بعد عامين ديال الزواج، فجو زوين بزاف، كيتبادلو الضحك والنظرات القريبة، ووقفو تايخدو تصاور مجموعين.

هاد الظهور خلا الناس يهضرو على احتمال أنهم يرجعو لبعضياتهم، والمعجبين تفاعلو بزاف فالسوشيال ميديا، وحتى كاين اللي بدا يقارن علاقتهم بعلاقة الأسطوريين إليزابيث تايلور وريتشارد بيرتون، اللي تزوجو جوج دالمرات.

لوبيز لعبات الدور الرئيسي فالفيلم، اللي هو اقتباس موسيقي لقصة معروفة، وأفليك كان المنتج التنفيذي عن طريق الشركة ديالو Artists Equity.

وخلال الحفل، شكرت لوبيز بن أفليك قدام الجميع وقالت: “هاد الفيلم ماكانش غادي يتصوّر بلا بيك يا بن… وغادي نبقى ديما معترفة ليك بهد الفضل”.

وهادا كان هو أول ظهور ديالهم مجموعين من بعد الطلاق، وكان باين الدعم المتبادل، بحيث تشاف أفليك كيساعد لوبيز حيت كانت لابسة صباط بكعب عالي، وتصوروا مع باقي طاقم العمل، بحال الممثل توناتيوه والمخرج بيل كوندون.