وكالات//

كاميرا د المراقبة سجلات اللحظة اللي فلت فيها مول طوموبيل تيسلا من الموت ولا من جروح خطيرة، من بعد ما تْفجّر محوّل ديال الشارجور وهو كيشارجي الطوموبيل ديالو فـ مقاطعة بريتيش كولومبيا فـ كندا.

وحسب التقارير، السائق كان كيشارجي طموبيلتو فـ محطة تجارية ما تبعاش لتيسلا، فـ مدينة “هوب” الكندية، وكان كيعتمد على محوّل من نوع A2Z اللي كيسمح تربط شواحن وخا ماشي ديال تيسلا مع السيارة.

ولكن هاد المحوّل ما كانش عندو شهادة اعتماد رسمية فـ كندا، ووقع فيه خلل كهربائي منين ربطو الشيفور، الشي للي تسبب فـ انفجار قوي تصوّر بالكاميرا.

ورغم الانفجار الكبير، السائق خرج غير بشي خدوش خفيفة، وما تضرّ حتى واحد آخر.

التحقيقات بيّنت باللي الشارجور والمحوّل بجوج كانو فيهم مشاكل تقنية، حيث الشارجور صيفط تيار كهربائي غير طبيعي للمحوّل، اللي تْفجّر وتفرّق على شكل قطع.

مول الطوموبيل قال إنه كان كيشارجي بهاد الطريقة أكثر من عامين وما عمره وقعات ليه مشكلة، ولكن هاد الحادث كان إنذار قوي بأن حتى الأجهزة اللي كتبان مزيانة ممكن تفشل فـ أي لحظة إذا ما كانتش معتمدة ولا مطابقة للمعايير.

ورغم أن هاد النوع ديال الحوادث قليل، إلا أنه كيبين كيفاش أي خطأ كهربائي بسيط يقدر يحوّل الوضع من آمن إلى كارثي فـلمحة عين.