كود هناء ابو علي ///

البارح تعطى فيديو محمد السادس كيدور فالرباط بعد افتتاح البرلمان لهاداك مول السوابق سفيان بحري. محكوم بعام وخرج بعفو.

الفيديو فيه الملك لابس جلابة فطونوبيلة كاط كاط. بعد بدقايق الناس داولو الماركا والخصائص ووو من خلال مقال نشراتو مجلة “تيربو” اللي كيدوز فقناة “ام 6” الفرنسية. الفيديو كان فيه جانب زوين. شافوه مواطنين ومواطنات فرحو وجاو يتصورو معاه. فرح بيهم وخلاهم يتصورو معاه

الفيديو كان يكون زوين كون تصور مقاد. وقبل هاد الشي كون ماشي هاداك سفيان بحري هو اللي خرجو فصفحتو. راه عندو سوابق وتشد بمجموعة من التهم منها “إهانة موظفين عموميين أثناء قيامهم بمهامهم، وإهانة هيئة منظمة”. راها هاد الناس اللي خدامين للدولة وهما جزء من الدولة تعرضو الاهانة من قبل هاد الانسان وكيشوفوه مخرج فيديو على سيدنا. ماشي غاديين يحسو غير بالحگرة راه كيعطي صورة خايبة على الدولة.

كاينة نقطة اخرى فهاد القضية. رئيس الدولة مع المواطنين بعد هاد الغياب٬ راها صورة مزيانة. خاصة ان الفيديو ما كيبان لا حراس لا والو. كيعزز الثقة فالبلاد٬ غير هو كاين مشكل اخر فالطونوبيلة. كثار البارح دورو بيناتهم الفيديو ومقال تنشر ف”ام 6″ فمجلتهم “تيربو” ديال الطونوبيلات. مقال فيه ثمن الطونوبيلة ونوعيتها وخصائصها. هادو اللي روجوه ملكيين وكيموتو على الملك وماشي عياشة.

كان اللي صور الفيديو يركز على باش قربو من سيدنا وتصورو معاه ماشي باش كان شوية بعيد. هاد اللقطة هي اللي عطات معطيات للماركة.

طبعا مول الفيديو عارف باللي كاينة حرب. ما كنهدرش على المعارضين اللي فالداخل. اللا. كاينة دولة جارة مقابلة الشادة والفادة. فاوقات الحرب خاصك تحضي كل تفصيلة. فهاد الفيديو كانت فيه اساءة للمغاربة وللملكية. شكلا لان اللي تعطى ليه باش ينشرو عندو سوابق وحتى تفصيلة فالمضمون اللي كتعلق باسم الطونوبيلة.