كود سعيد الشاوي كازا ///

بدات محاكمة لڤيدورات ديال أوطيل عين الذياب، اللي سبق ليهم تعتاقلو فغشت الفايت بعد ما تسببوا في قتل سعودي. البارح لثلاث 21 مارس كانت اول جلسة دلمحاكمة ديالهم.

القضية تأجلات لرمضان لإعداد الدفاع، و5 دلفيدورات رجعوا من المحكمة لعكاشة، والمسؤولين ديال لوطيل الثلاثة حتى هما تابعاتهم المحكمة في حالة سراح. غريبة هاد حالة سراح لوحدين مسؤولين مباشرة على هاد الڤيدورات وما يمكنش يديرو شي حاجة بلا خبارهم.

هاد لوطيل سبق كان فغشت حديث ديال شي سعودي تقتل في الكازينو، قبل يقولو بلي تقتل في الغرفة ديال ملي حيح وشدوه الڤيادرة وضربوه باش يبرد السوق.

التهم اللي متابعين بيها خطيرة وتتعلق بالمساهمة في الضرب والجرح المفضي الى الموت دون نية احداثه والاحتجاز والمساهمة في الضرب والجرح العمدي ترتب عنه الموت دون نية القتل والمساهمة في الاحتجاز المقرون بتعذيب الشخص المحجوز.

السفارة ديال السعودية حتى هي غتدير محامي، باش يدافع على حقوق الضحية اللي مات، وسبق ليها قالت بلي ما غاديش تزاكل على حق المواطن تاعها.

وحسب المحاضر اللي شافتها “كود”٬ فالڤيادرة ربطوا الضحية وقراطوه، بقوة، وهو مريض، والتشريح الطبي بين بلي تهرس ليه عظم في عنقو، وهادشي اللي بين بلي القضية ماكانت غير تدخل عادي، بل كان استعمال العنف والقوة، والاحتجاز والتعذيب.

القضية غتكبار حسب محامي من كازا، حيث قال بلي ما يمكنش الفيدورات يكونو من دايتهم لروسهم عملوا هادشي، وهما غير مأجورين، والفاعلين الأصليين خاص يبانو، سواء اللي عطى الأمر أو اللي ميك وشجع على استعمال القوة.

دابا القضية كبيرة وخاص كل واحد يخلص على جريمتو. اولهم مسؤولي لوطيل