سهام البارودي – كود//

فوقما كاتخرج شي مرا تهضر على شي حاجة و لا تبدا شي نقاش، و لا تبان فالتلفزة، كايخرجو جيوش الزومبي باش يقولو لينا مالقاتش لّي يبرّد ليها الساكن ، خاصها لّي يبردها، كون لقات لّي… شفتي المرا فاش ماكايكونش لّي…

را قهرتونا بهاد لّي ! و كون غا ماكاينينش الإحصائيات الرسمية لي كاتقول بلي النص فالمغاربة كايعانيو من الضعف الجنسي بجميع الاشكال و الانواع، ها لي عندو ضعف الانتصاب، ها لي عندو انتصاب و لكن غير كامل، ها القذف السريع… راه العيالات كايضلّو يعاودو فاللايفات فتيك طوك على المعاناة ديالهم مع رجالاتهم و هادشي راه كانشوفوه، بنادم مدعوق، لا ماكلة زينة، لا مصروف زين، بزاف ديال الرجال عندهم مرض السكري، و الضغط و الشرايين، زيد على هادشي نمط الحياة، بنادم كايكمي و كايشرب و ماكايكلش مزيان و ماكايتهلاش فصحتو ، و بلا مانهضرو على لي أصلا أصلا باغي يضرب المسوس و لكن الظروف خلاتو يطلع فوق الميدة و يغنيو ليه داها و داها مولاي السلطان و الله الا خلاها و هوا راه خاص يغنيو ليه “هاكا يكونو بنات الرجال محضية” ، راه نورمال يكون ضعف جنسي و لي طبعا ماشي معيورة فحق الراجل، المرض ماشي عيب، و كاين العلاج و بونكوراج للإخوان لي محّنين.

و لكن عيقتو على هاد العيالات، غا لي دوات، غا لي بغات تعبّر على شي حاجة ضارّاها، غا لي بغات تبان، كاتبغيو تحشّموها زعما، تمرگوها زعما راه غا الهيجان الجنسي لي دايرها ليها كون لقات لّي… كورّاها ساكتة فحال شي نعجة.

المرا كاتشكّى من الزلط ديال الراجل و وواحد كايقوليك خاصها “لّي”…
إنسانة مشات لشي إدارة و ماحتارمهاش الموظف و لا تحرش بيها، غوتات و من حقها،  غايجي بوگرن كايجري باش يقوليك مالقاتش لّي…
بنادمة سخفانة برمضان و الصيام و العيا و قلة النعاس، بسل عليها شي كليان و خاصمات عليه غايقوليك حيت مالقاتش لّي…
وحدة عيات بغسيل الماعن د رمضان باغا لاڤيسيل انديزيت سطاشر كوڤير وواحد كايقوليك خاصّها “لّي”
وحدة حمقوها الدراري باسلين و صعاب و خاصها لي يهز معاها الحمل و يعاونها لاغوتات كايقوليك، مالقاتش “لّي”…
وحدة محصلة الراجل كايشاطي مع صاحبتو فواتساب و لا خاصمات و تفرگعات كايقوليك، حيت ماكاينش “لّي”…

“لّي” ديالك آ خويا مع عدم احتراماتي ليه راه ماشي دواء لكل داء، غا جمعو فداك الگرصون و خلي العيالات يهضرو و يغوتو و يعبرو على شنو ضارّهم، ايه “لّي” فاش كايكون شي “لّي” نيت راه بحلاوتو و عندو دور كبير فالتوازن الجنسي و النفسي للإنسان و لكن ليس ب “لّي” وحده يحيى الإنسان و خصوصا لاكان مرا ! فاجمع علينا قشاوشك بارك الله فيك.