أنس العمري – كود//

الكتابة على الحيط فكازا لي كتحرض لـ “قتل اليهود” تحلات قضيتها بسرعة البرق. بوليس كازا، وبعد لحظات قليلة على كتابة هاد العبارة، باشر تحريات مكثفة وصلات لمول الفعلة، فوقت قياسي.

وحسب مصادر “كود”، المعني بالأمر تشد، عشية اليوم الخميس، وبينات التحريات الأولية أنه كيعاني من اضطرابات نفسية، لتجري إحالته على المستشفى حيت يتابع العلاج.
يذكر أن العبارة كانت مكتوبة باللغتين العربية والإنجليزية على حيط واحد البناية اللي فيها مكاتب.

والصورة اللي كتوري هاد العبارة التهديدية شاركها ويليام أزولاي، حفيد المستشار الخاص ديال سيدنا أندري أزولاي. ومعها، جا منشور آخر فيه الصورة مع عبارة: “مذعور.. على بعد 5 دقايق من مكتب أخي”.

وخلق هاد التحريض تجاه اليهود فبلادنا موجة استنكار واسعة على مواقع التواصل الاجتماعي، حيث عبروا بزاف الناس على رفضهم القاطع لهاد النوع من الرسائل الخطيرة والمسيئة.