كود الرباط//

الوثائق اللي توصلات بيها “كود” كتكشف على واحد الوضعية مرتبكة فمقاطعة أكدال–الرياض، خصوصا فالدائرة اللي قريبة من قاعة بن ياسين. مواطنين كيتشكاو من غياب بعض رؤساء المصالح اللي مكلفين بالتوقيعات الرسمية سواء ديال تصحيح الإمضاء أو الموظفين المكلفين بتسجيل الولادات الجديدة او الوفيات والإحصائيات وغيرها، وهاذ الغياب كيعطل بزاف ديال مصالح المواطنين اليومية.

في المقابل، نفس المسؤولين كيسابقو الزمن فالتأشير على الصفقات و”البون د كوموند”، وكأن الأولوية عندهم هي تمرير الصفقات المالية عوض خدمة المواطنين. وحسب وثيقة حصلت عليها “گود” حتى هاد الصفقات عليها صداع وشكايات توصلت بهم اللجنة الوطنية للطلبيات العمومية.

وثيقة رسمية المؤرخة بـ1 فبراير 2024 واللي موقعة باسم رئيس مجلس مقاطعة أكدال–الرياض كتأكد أن مصلحة تصحيح الإمضاء والمصادقة على الوثائق بقات بلا رئيس مصلحة منذ 3 نونبر 2023.

ومع ذلك، كيبان أن رئيس المقاطعة اللي منتمي لحزب الاستقلال، وهو متقدم فالعمر، ما قادرش يواكب متطلبات التحديث ولا يسد هاذ الفراغات الإدارية، في الوقت اللي كيعطي فيه أهمية أكبر للعراضات والمهرجانات على حساب المرفق العمومي.

الجدول الإداري لشهري ماي ويونيو 2025 كيبين أن المداومات موزعة بين الموظفين، لكن الواقع كيقول أن الغياب وعدم الانضباط كيدفع المواطنين يتعطلوا فتوثيق مصالحهم. هادشي كيعكس سوء التدبير وضعف المراقبة، خصوصا وأن الإدارة المفروض خصها تخدم بشكل مستمر وفعّال.

الفوضى اللي كتعرفها مقاطعة أكدال–الرياض ماشي غير مشكل ديال غياب بعض الموظفين، وإنما مشكل أعمق كيرتبط بعجز الرئيس عن تدبير أمور المقاطعة. الوثائق الرسمية كتأكد وجود فراغ إداري فمصلحة حساسة بحال تصحيح الإمضاء، والمواطنين كيبقاو الضحية الأولى فظل هاد الوضعية.