كود سبور//

بالعفوية والنية شفنا درابو بلادنا طلع وسط بطولة عالمية بحال Kings League لي كينظمها جيرارد بيكي، ولكن بلاصت ما يخليو هاد العفوية تمشي بوحدها وتحقق الانجازات ضروري يدخلو صحاب التشويش والاستغلال من اجل الارباح المالية.

الفرقة المغربية بقيادة الياس المالكي دارت بصمة زوينة وسط بطولة فيها نجوم عالميين وكوارية معروفين، وجامعة الكرة فرحات، وصيفطات الدعم والمعدات والطبيب، ودارت ليهم استقبال رسمي ديال الابطال فمطار الرباط سلا. هادشي كلشي دارو هاد الشباب بلا وسطاء، بلا شركات، بلا كذوب بلا زواق وكالات التواصل لي كينهبو المال العام.

ولكن المشكل دبا بدا منين بداو كيتحركو شركات تواصل عجيبة مولفين يمصو البزولة ديال الصفقات، كتقول بلي هي لي واقفة على المشاركة المغربية وهي غاتقاد صورة المملكة فهاد المسابقة. من بين هاد الشركات فيها شركات كيخدمو مع الجامعة د الكورة ومنهم كذلك شركات كيسيروها زماگرية عايشين على برا، ولقاو فهاد الإنجاز فرصة يركبو عليه وطبعا الهدف واضح خاص يضربو الفلوس، على حساب شكون؟ على حساب الياس المالكي وفرقتو لي كتمثل المغرب رسميا ف النسخة الحالية.

حسب مصادر “گود”، لي خايب فهاد الديكور، هو أن هاد الشركات ولاّت كتدير الضغوط، وبغات تملك تواصل ممثل المغرب فهاد البطولة وبغات تفرض على المالكي شروط معينة من بينها مثلا يشرك معاهم اللعاب مهدي عمري، لّي أصلاً دار مشاكل فالبطولة السابقة، ورفضوه لاعبين فالفرقة. منين الياس قال ليهم لا، حسب مصادر “گود”، بدات كتبان تدوينات وفيديوهات فالسوشل ميديا ضد المالكي، فحملة خايبة. وهنا كيطرح سؤال كبير : شكون موراها مع اقتراب هاد البطولة؟.

النية والعفوية ديال المالكي كتغلب على بزاف ديال التخلويض والزواق وكتفرش بزاف ديال المؤثرين..واش معقول تدار بطولة عالمية وتشارك فيه فرقة باسم المغرب، ويجيو ناس كيحسبو راسهم فوق القانون والمجهود الجماعي، فقط حيت عندهم وكالة تواصل ديال “الانستغرام”.

الناس لي كيخدمو بصمت وبعفوية، وبعيدا على الگاميلة و”مارشيات التواصل” يكلمو خدمتهم. و النيفو يطلع بيد الناس لي فعلا باغين يشرفو المغرب، ماشي طامعين فالصورة ديالو.

المالكي وفرقتو دارو خدمتهوم. دابا خاص لي يحمي هاد الصورة من التشويش. حيت بزاف ديال الوكالات الطماعة ما كتفرقش بين حب البلاد وحب الربح السريع.