كود سبور//

كيتجه ماميلودي صن داونز الجنوب إفريقي برئاسة باتريس موتسيبي اللي هو فنفس الوقت رئيس الاتحاد الأفريقي، نحو الانسحاب من مسابقة السوبر ليك الافريقي.

وكشف موقع “فاربوست” الجنوب إفريقي، أن صن داونز كيدرس الانسحاب من مسابقة السوبر ليك الافريقي، بسبب الأجندة ديال الفريق اللي لاعب البطولة الجنوب إفريقية وعصبة ابطال أفريقيا، وكيشوف أن الوقت اللي منظمة فيه بطولة السوبر ليك الأفريقي ما مناسباهش.

وحسب نفس المصدر، فبنسبة كبيرة صن داونز غينساحبو خصوصا وأنهم راسلو الشركة المسؤولة على تنظيم بطولة السوبر ليك الأفريقي، ومازال ما توصلو من عندها بحتى شي رد حول العائق اللي عندهم، وان الانسحاب فيشكل ضربة قاصحة للمسابقة فالنسخة ديالها الاولى.

وحدد الاتحاد الأفريقي يوم 20 أكتوبر موعد لانطلاق السوبر ليك الأفريقي، بمشاركة الوداد الرياضي والاهلي المصري، وأنيمبا النيجيري، والترجي التونسي، وصن داونز الجنوب إفريقي، سيمبا التنزاني، وتيبي مازيمبي الكونغولي، ومازال ما تعرف مصير بيترو أتلتيكو الكونكولي اللي تعلقت المشاركة ديالو إلى حدود الآن بسبب قضية تلاعب فالماتشات فبلادو.