كود سبور//

خالق مستقبل الدولي المغربي سفيان أمرابط، جديل كبيرة مرة اخرى، واخا كايلعب دابا مع فنربخشة التركي ومتألق معهم والأكثر من هذا عطى قوة لوسط تيران المدرب جوزي مورينيو اللي كايطالب ادارة الفريق التركي بشراء العقد ديالو بشكل نهائي من فيورنتينا الطالياني.

وكشفت جريدة “turkiyegazetesi” التركية، أن سفيان أمرابط اللي جابوه فنربخشة إعارة لموسم واحد من فيورنتينا، مع خيار شراء العقد ديالو بشكل نهائي، ولى عنصر اساسي وقطعة مهمة بالنسبة للمدرب جوزي مورينيو، وان الفريق التركي قرر يشري عقد امرابط اللي مازال فيه 3 مواسم مع فيورنتينا.

ولكن اللاعب المغربي اللي القيمة ديالو 25 مليون اورو حاليا، ناويين فنربخشة الاستثمار فالصفقة ديالو، وماشي الغرض هو رياضي فقط، ولكن مخططين حسب الجريدة إلى شراء عقد سفيان أمرابط من فيورنتينا ويخلصو قيمة شراء العقد بشكل نهائي اللي هي 13 مليون أورو، ويبيعوه العقد ديالو لفريق الاهلي السعودي بمبلغ 25 مليون أورو على الاقل، حيث الفريق السعودي طامع مدة هادي فخدمات النجم المغربي.

وكايبقى السؤال المطروح هنا، واش البرتغالي جوزي مورينيو مدرب فنربخشة غايخلي ادارة النادي تدير هذه الخطوة إلى كان خبر الجريدة التركية صحيح، خصوصا وان المدرب البرتغالي معروف بالصرامة ديالو والدفاع عن اللاعبين اللي كايبغيهم يكونو عندو فالفريق.