كود- عن ليكونوميست//

محمد البلاوي، أو “روبيل سبيريت”، لونصا أول سبرديلة بستيل رسوماتو متعددة الألوان، اللي كيستعرض من خلالها، بطريقة خاصة وبسخرية، الحياة ديال الكازاويين.

وقال البلاوي، اللي كيحلم باش المواهب ديالو توصل لمجال التصميم الصناعي: “دابا ثقافة السبرديلات المشكلين من طرف فنانين ومصممين ولات آ لا مود فميريكان بالخصوص، تخيلت ندير سبرديلة، وتكون موقعة من طرف ماركة “نايك”، هذا كيبقى حلم لكن تقدر هذ الشراكة واحد النهار تولي حقيقة”.

الحب ديال الفنان لمدينتو، والعاصمة الاقتصادية ديال المغرب، كيخليه يتخيل مشاهد من الواقع ديال سكانها: لومبوتياج، والكلاكسون، والهاراج، والصداع، والمضاربات… هذ المشاهد اللي كيحطهم وبطريقة كتفرح وكتضحك فالأعمال ديالو.

دابا، المشروع ديالو هو يحط هذ الأعمال الفنية على السبرديلات، باش يسوقها من بعد على نطاق واسع: “بدينا مع واحد الصديق على رأس واحد الورشة دالسبابط، كيف كاينين المئات فكازا، وغادي نبداو ننتجو هذ السبرديلات، كنتمناو هذشي يلفت انتباه ماركات عالمية، باش نديرو موديلات خرين ونصدروهوم لبرا”، كيقول الفنان.

البلاوي عارف الصعوبات اللي ممكن تواجهو ميف واجهات عدد من الفنانين فمجال الرسم الصناعي فالمغرب، خصوصا و”أنت بزاف ديال المثنعين كيفضلو يصنعو ليميتاسيون على الابتكار الجديد اللي يقد يطيح عليهم غالي، فالمغرب عدنا فنانين واعرين ولكن عمرهم قدرو يصدرو الفن ديالهم بسباب المشاكل اللوجستيكية وشحال غتحسب عليهم الديوانة، وكيطلبو بزاف ديال الوراق بحال كيف كيطلبو لشركة باغة تصدر آلاف البياسات، هذا مشكل كيأثر علينا بزاف”، على حساب هضرتو.

كذلك، البلاوي خدام على كوليكسيون ديال التيشورتات، واحد الشراكة جارية باش يكون لونسمون فالشهورا الجايين، وفالانتظار الفنان غادي كيكمل فالرسومات ديالو الإبداعية على كازا وناسها.

والبلاوي فنان تشكيلي فعمرو 32 عام، تزاد فكازا، مولوع بفنون الحضرية، خريج معهد الفنون الجميلة فكازا ف2013، مهتم بالقصص المصورة وفنون الشارع التشكيلية.

https://www.leconomiste.com/article/1080315-rebel-spirit-fait-du-pied-nike