كود – وكالات //

قال الرئيس الأميركي دونالد ترامب باللي كاين تفاوض مع إيران، ولكن باين باللي هاد المفاوضات ما غاديش تكون ساهلة، حيث ترامب لاصق فربعة ديال المطالب الأساسية وما ناويش يتراجع عليهم.

هاد المطالب أولها تحيد إيران البرنامج النووي ديالها، وتوقف مشروع الصواريخ الباليستية، وتحبس دعم وتمويل الجماعات التابعة ليها فالشرق الأوسط، وتكايس على المتظاهرين اللي لي كيحتجو وسط البلاد.

فالمقابل، إيران باغية المفاوضات تبقى محصورة غير فالبرنامج النووي، وما تتفتحش ملفات أخرى، حسب تقارير غربية اعتبرت أن الهدف ديال ترامب من الدخول فالتفاوض هو يجمع دعم داخلي وخارجي قبل أي خطوة عسكرية محتملة ضد إيران.

وخا أن مسؤولين كبار فإدارة ترامب عارفين باللي إيران ما غاديش تقبل هاد الشروط، وكيشوفو باللي ما كايناش فرصة حقيقية لشي اتفاق، البيت الأبيض أكد أن المحادثات مازال مقررة هاد الأسبوع.

اللقاء غايدار فسلطنة عُمان نهار الجمعة، من بعد ما طلبات إيران تبدل البلاصة والصيغة ديال المفاوضات. المتحدثة باسم البيت الأبيض قالت باللي ترامب كيعطي الأولوية للدبلوماسية، ولكن شددت باللي الخيار العسكري مازال مطروح إلى فشلات المفاوضات.