كود تطوان//

من بعد واحد المطاردة بحال ديال الأفلام ديال “الأكشن” طرات في نواحي تطوان ، قدرات عناصر الجدارمية فبنقريش، مع مغرب ديال اليوم الخميس، توجه ضربة قوية لشبكات التهريب، فعملية متقونة حجزات فيها كمية كبيرة من الحشيش وصلات لجوج طُن ونص، كانت فواحد السيارة من نوع “فورد ترانزيت”. هاد العملية ما تعتبر من أكبر الضربات اللي تعرضات ليها شبكات التهريب فالمنطقة فالشهور اللخرين.

وكيف قالت مصادر من المنطقة ل (كود) العملية جات من بعد تتبع دقيق وتحريات ميدانية على تحركات مشبوهة ديال شبكة كايشتبه فتورطها فالاتجار فالحشيش. وبمجرد ما تحركات السيارة فاتجاه ديال بنقريش نواحي تطوان، تدخلو الجدارمية بسرعة وحجزو الكمية الكبيرة، وقدرو يوقفو الشيفور ديال الطومبيل رغم أنو بغى يهرب.

وقالت مصادر (كود) أن الشيفور حاول يهرب ملي شاف البراج فالطريق الوطنية، ولكن الجدارمية تبعوة قبل ما يشلو الحركة ديالو ويوقفوه.

.