كود – كازا //

بداو المهنيين ديال قطاع النقل كيدفعو الملفات ديالهم باش يستافدو من الدعم اللي قرراتو الحكومة، وهاد الشي جا باش ينقص  من تأثير الغلا  فأثمنة البترول عالمياً، اللي فاتت 100 دولار للبرميل.
.
هاد الدعم غادي يشمل نقل السلع، وشركات نقل المسافرين، والطاكسيات  (الصغيرة والكبيرة)، وزيد عليهم الطوبيسات ديال النقل الحضري والنقل السياحي.

صحاب الطاكسيات الصغار غادي ياخدو تقريباً 1200 درهم، اما الطاكسيات الكبار غادي ياخدو  2200 درهم.

أما صحاب الكيران اللي كينقلو المسافرين بين المدن، غادي يوصل الدعم ديالهم حتى لـ7000 درهم. هاد الدعم غادي  يتصرف  ابتداءً من أبريل، من بعد ما يتقراو الملفات ويتصادَق عليهم، وغادي يتحوّلو الفلوس للحسابات البنكية ولاجونصات ديال التحويل .

هاد الدعم غا يشمل 180 ألف مستفيد، ب 2 مليار درهم من ميزانية الدولة، ومزال ما تحدداتش المدة ديال هاد الدعم، مع العلم أن البرنامج اللي فات دام 3 سنين من 2022 حتى للعام اللي فات ومن بعد تحبس.

وفنفس السياق، وزارة التجهيز والنقل حلات منصة إلكترونية من نهار الجمعة اللي فات باش يستقبلو طلبات المهنيين، باش يسهل عليهم الاستفادة من هاد الدعم الاستثنائي .

بالمقابل، كاينين فئات ما غاديش تستافد من هاد الدعم، بحال الترونسبور  المدرسي وكاميونات الشركات الصناعية، وهاد الشي ممكن يطرح مشكل فطلوع التكاليف ديال الخدمات ديالهم.

جمعيات حماية المستهلك طالبات بالمراقبة، باش ما يتستغلوش هاد الدعم فرفع الأثمنة، كيفما وقع فالتجربة الفايتة ، اللي وخا الدعم اللي فات 7 مليار درهم، بعض المهنيين بقاو كيزيدو فالثمن.