الوالي الزاز -كود- العيون///

[email protected]

سالا قبل قليل اللقاء اللي كان بين الأمين العام للأمم المتحدة، أنطونيو گوتيريش، والمبعوث الشخصي ديالو لنزاع الصحراء، ستافان دي ميستورا واللي دام نحو 35 دقيقة.

وخلال اللقاء بين گوتيريش وستافان دي ميستورا، نقل الأخير للأمين العام للأمم المتحدة تصلب المواقف اللي كاين بين أطراف النزاع، بحيث كاين إصرار على عدم تقديم أي تنازلات لا من طرف المغرب اللي بلغو بالتصور ديالو لحل نزاع الصحراء، ولا بالنسبة للبوليساريو اللي متمسكة بأطروحتها للنزاع ورافضة أي موائد مستديرة وباغة مفاوضات مباشرة مع المغرب بتوجيه من الجزائر اللي تعيد وتكرر نفس الكلام فلقاءاتو معاها.

المبعوث الشخصي وفخضم هاد المباحثات نقل أيضا، للأمين العام للأمم المتحدة، أن تصلب المواقف لا يخدم مساعيه فتقريب وجهات النظر وبعث مزيد من الثقة بين المعنيين بالأمر، مؤكدا أن الأعمال شرق الجدار الرملي تقوض جهوده فظل تنصل البوليساريو من اتفاق وقف إطلاق النار وإصرار المغرب على وقفها وتأكيدو على التزامو باتفاق وقف إطلاق النار وفنفس الوقت حزمو فالرد على أي استفزازات.

وفسياق نفس الاجتماع أحاط المبعوث الشخصي أنطونيو گوتيريش أن گاع اصحاب المصلحة ويتعلق الأمر بمجموعة أصدقاء الصحراء الغربية فمجلس الأمن الدولي تدعم جهود الأمم المتحدة ومساعيها لإحياء العملية السياسية، ولكن بغات نهاية لهاد الملف ومستاعدة تقدم المساعدة ومنخارطة بشكل إيجابي فهاد الجهود.

وأخطر ستافان دي ميستورا أن بعثة الأمم المتحدة في الصحراء “مينورسو” كتواجه صعوبات فأداء مهمتها وحتى فالوصول لعدد من المناطق شرق الجدار الرملي، وكذلك صعوبة وصول التموين لعناصرها بسباب تعنت جبهة البوليساريو ومنعها لقوافل التموين خاصة مادة البنزين باش تنقل.

وكشف المبعوث الشخصي للأمين العام للأمم المتحدة أنطونيو گوتيريش، أنه باقي مؤمن بإمكانية التوصل لصيغة لإعادة إطلاق العملية السياسية، ولكن للوصول لهاد الصيغة كاين بزاف ديال الإكراهات بحال الأعمال العدائية اللي خلات النزاع أكثر تعقيدا، مشيرا أن هاد العملية السياسية تحتاج مطالبات من الأمين العام للأمم المتحدة لأصحاب المصلحة باش يلعبو دور إيجابي ويقنعو الأطراف بضرورة التنازل وبناء الثقة وحثهم على عدم وضع شروط مسبقة.

وأضاف ستافان دي ميستورا، أن زياراتو للمنطقة ولقاءاتو بمختلف الفعاليات فالصحرا أو فمخيمات تندوف أو فالجزائر أو فموريتانيا مكناتو من اكتساب تصور حول شنو واقع وآراء كل طرف ومدى انخراطو فبناء العملية السياسية.