كود الرباط//

انطلقت مساء أمس الثلاثاء، دعوات كثيرة لمقاطعة منتوجات استهلاكية على رأسها الحوت والبيض واللحم والدجاج، بسبب الغلاء لي كتعرفو هاد المواد هاد الايام.

صفحات مشهورة وعندها متابعين بمئات الآلاف، اتفقوا على حملة مقاطعون، واللي عرفت مشاركة عشرات الآلاف من البارطاج والتعليقات، الهدف هو تبدا مقاطعة كبيرة لعدد من المنتجات ابتداء من اليوم الأول فرمضان.

سبب المقاطعة هو هاد النقاش لي داير حول ثمن السردين واعترافات وزراء الحكومة بوجود متلاعبين ومضاربين بالأسعار، بحال وزير الصناعة والتجارة رياض مزور لي قال تصريح خطير على قناة ميدي1 تيفي: “18 مضارب كيتحكمو في أسعار اللحوم والأرباح تناهز 40 درهما للكيلو الواحد”.

بزاف استغربو من داك الحوات المراكشي لي دار بوليميك كبير على ثمن السردين وكيبيعو بـ5 دراهم، وملي جات لجنة مختلطة باش تراقب الشروط الصحية فالمحل مشاو باش سدو ليه. تجمعو الناس. جاو يشريو وشافوهم السلطات دارو بناقص. ماشي بسبب الثمن فقط بل حيث هاد لجان المراقبة مشات غير عندو ومقدراتش تبع السماسرة والمضاربين.

الغلاء بزاف كاين فاللحم، خصوصا كانو إجراءات الدعم ديال الاستيراد وإعفاءات ضريبية مهمة استفدوا منها المستوردين ولكن الثمن باقي طالع. طبيعي تنوض المقاطعة، والاحتجاج.

المقاطعة هاد المرة معندهاش خلفيات سياسية أو كتحركها جهة ضد مصالح شركات معينة، بل مقاطعة على منتوج محلي كيتعرض للمضاربة فرمضان، على الحوت والبيض طبعا، وزيد عليها اللحم وماطيشا.