كود ـ فكيك//

عرفات الطريق الرابطة بين منطقة أنباح وبوعنان بضواحي فكيك، صباح اليوم الاثنين 22 دجنبر الجاري، حادثة سير خطيرة بعدما تقلبات سيارة ديال النقل المدرسي كانت متجهة من منطقة أنباح باتجاه بوعنان، وعلى متنها مجموعة ديال التلميذات اللي كانوا فطريقهم للمدارس ديالهم.

وحسب المعطيات اللي توصلات بها “كود”، هاد الحادثة خلفات مصرع فتاة بعين المكان، فمشهد خلف حزن وأسى عند آباء وأولياء الأمور. وتصابت حوالي 14 تلميذة بإصابات متفاوتة الخطورة، بعض الحالات منها وصفت بالمقلقة، إلى جانب السائق.

المصابين كاملين خضعوا لإسعافات أولية وتنقلو على وجه السرعة لمستشفى مولاي علي الشريف بمدينة الرشيدية، عبر عدد من سيارات الإسعاف، المدنية والعسكرية، باش يتلقاو العلاجات الضرورية، فانتظار صدور الحصيلة الرسمية من الجهات المختصة.

ومن جهتها، فتحت لابيجي ديال الجدارمية تحقيق فهاد الحادثة، ودارت الإجراءات القانونية المعمول بها، حيث تم نقل جثمان الضحية لمستودع الأموات، تحت إشراف النيابة العامة المختصة، من أجل تحديد ظروف وملابسات الحادث ومعرفة الأسباب الحقيقية اللي كانت وراء هاد الفاجعة.