كود – وكالات //

بينات تقارير جديدة بلي كاين ارتفاع كبير فعدد حالات سرطان القضيب فالبرازيل، وهو مرض قليل ولكن خطير، وكيخلي بزاف ديال الرجال يوصلو حتى لقطيع العضو بسبب روطار فالتشخيص والعلاج، هاد الوضع كيطرح تساؤلات كبيرة على الأسباب وكيفاش يمكن يتفادى.

فهاد السياق، كيعاود جواو لي فعمرو 63 عام، المعاناة ديالو مع المرض، القصة بدات غير بتولال صغير، ولكن الأطباء ما عطاوش له أهمية كبيرة من بعد سنوات من العلاجات اللي ما نفعاتش، وتبيّن أنه مقيوس بالسرطان، واضطر يدير عملية قطيع جزء من العضو ديالو،هاد التجربة وصفها بأنها صعيبة نفسياً وجسدياً.

حسب المعطيات، تسجلو تقريباً 19,900 حالة بين 2013 و2022، ومنهم 5,600 وصلو للقطيع، يعني كاين أكثر من 10 عمليات ديال القطيع فالسيمانة، والعدد كيزيد خصوصاً فالمناطق الفقيرة.

الخبراء كيقولو أن هاد الارتفاع جاي لقلة الوعي الصحي، وضعف النظافة، وزيد عليها الحشومية اللي كتخلي بزاف ديال الرجال ما ميشيوش للطبيب بكري، حتى الظروف الاجتماعية والاقتصادية عندها دور كبير فانتشار المرض.

الأطباء كيقولو بلي هاد السرطان ساهل يتفادى إلى كان الوعي والنظافة اليومية بالما والصابون واستعمال البريزيرفاتيف والتلقيح ضد فيروس HPV، وقطيع الگارو.