وكالات//

تصدّم عالم ألعاب الفيديو بوفاة المطوّر الأمريكي المعروف فينس زامبيلا، واحد من العقول اللي ساهمات فإطلاق سلسلة الألعاب العالمية “كول أوف ديوتي”، عن عمر 55 عام، بعد حادثة سير مؤلمة وقعات فولاية كاليفورنيا. شركة “إلكترونيك آرتس” أكدت الخبر فبلاغ رسمي وعبّرت على الحزن الكبير ديالها بهاد الخسارة.

الحادثة وقعات ف لوطوروت فمدينة لوس أنجليس، ملي طومات سيارة من نوع “فيراري” كان راكب فيها زامبيلا مع شخص آخر، وضربات فحاجز ديال الإسمنت ومن بعد شدات فيها العافية. شرطة الطرق السيارة فكاليفورنيا قالت باللي سبب الحادث مازال ما معروفش، ووضّحت أن واحد من الركاب تلاح من خارج الطوموبيل، بينما الآخر بقى محصور داخلها، وتوفّاو بجوج فالحين.

شركة “ريسباون إنترتينمنت”، اللي زامبيلا كان من المؤسسين ديالها، عبّرت على التأثر الكبير ديالها بهاد الفاجعة، ووصفت الرحيل ديالو بالخسارة اللي صعيب تتتصوّر. وقدّمات التعازي لعائلتو ولأصدقائه وزملائه، وذكّرات بالإرث الكبير اللي خلّف فمجال تطوير ألعاب ولات جزء من ذاكرة جيل كامل ديال اللاعبين.