كود سبور//

اعتبر حسن فكاك المدير التقني للجنة الأولمبية المغربية، حصيلة الرياضة المغربية فأولمبياد باريس2024، بالإنجاز الكبير، مقارنة مع الثلاث دورات الأولمبية السابقة، ولكن خاص إعادة النظر فعمل مجموعة من الرياضيين والجامعات الرياضية وفطريقة العمل ديالهم، وأكد أن المغرب عندو إمكانيات باش يجيب ميدالية أولمبية وكاينين بعض الرياضات اللي الأبطال ديالها عندهم مؤهلات باش يديرو ميداليات، واستافدو من مساعدات كبيرة من اللجنة الأولمبية ومع الأسف ما كانوش فالموعد، ويجب إعادة النظر  فطريقة العمل.

وفتصريح له من باريس لقناة “الرياضية المغربية”، قال حسن فكاك المدير التقني للجنة الرياضية المغربية: “بكل صراحة ملي كانفكر فالحصيلة، كانفكر فجوج حوايج الميدالية الذهبية ديال سفيان البقالي لأنها إنجاز كبير حيث حافظ على الميدالية وهادي تاريخيّة فالأولمبياد، والميدالية البرونزية ديال المنتخب الوطني المغربي لكرة القدم، اللي فرح الشعب المغربي ودار إنجاز كبير، وكل الحاضرين هنا كايشهدو أن المنتخب المغربي كان خاصو يكون فالفينال ديال هاد الأولمبياد، لأنه ربح بـ4 لزيرو ضد الأمريكيين و6 لزيرو ضد المصريين، ودار واحد اللعب ممتاز يعني كانت عندو بلاصتو فالفينال، ولكن الميدالية البرونزية اللي حقق غاتعطينا رؤية باش ناخدو ميدالية ذهبية”.

وكمل المسؤول باللجنة الأولمبية المغربية: “بشكل عام فدورة باريس2024، درنا أحسن من دورة طوكيو2024، وأحسن من دورة ريو2016، وأحسن من دورة لندن2012، إذا كاين تحسن للمغرب وللرياضة المغربية وهذا إنجاز كبير، واللي كانلاحظ فهاد الدورة تأهلت 19 رياضة مغربية إذا خاصنا مازال نزيدو ونآمنو بريوسنا، كاينين بزاف ديال الرياضات او الرياضيين او الجامعات اللي خاصنا نديرو إعادة النظر فالعمل وكيفاش نحسنو ونغيرو ونعرفو علاش كانجيو للألعاب الأولمبية، المغرب عندو إمكانيات باش يكون وعندو إمكانيات باش يدير ميدالية على المستوى الأولمبي، أشنو ناقصنا؟ كاينين شي حوايج اللي ممكن نحسنوها ولكن لي غادي نركز عليه هو العمل والعمل والعمل”.

وأكد حسن فكاك: “كاينين بعض الرياضات اللي الأبطال ديالهم عندهم مؤهلات باش يديرو ميداليات، واستافدو من مساعدات كبيرة من اللجنة الأولمبية ومع الأسف ما كانوش فالموعد، علاش ما كانوش فالموعد؟ لأن المستوى عالي هذا صحيح، لان گاع اللي جايين هنا جايين يديو ميداليات بما فيهم الخصوم ديالهم، ولكن ربما الاستعدادت ما كانش هي هاديك، وربما خاصنا نديرو إعادة النظر فبعض طرق التهيئ، وخاصنا نشوفو النقاط اللي نحسنو بهم أداء الرياضيين ديالنا”.