الرئيسية > featured > ففرانسا بزَاف ديال الجزائريين فاش كايحلّو ريسطورون كايسمّيوه ريسطورون ماروكان حيت المغرب اليوم ولاّ علامة تجارية مشهورة ! فاش غادي منتوج سوا ريسطو سوا عطرية سوا ريحة سوا زيت و غاتزيد حداه مايد اين موروكو كاتضمن واحد الانتشار واسع حيت الناس لي كايعرفو المغرب اكثر بكثير من لي كايعرفو الجزائر و تونس و باقي دول افريقيا !
26/02/2024 20:00 featured

ففرانسا بزَاف ديال الجزائريين فاش كايحلّو ريسطورون كايسمّيوه ريسطورون ماروكان حيت المغرب اليوم ولاّ علامة تجارية مشهورة ! فاش غادي منتوج سوا ريسطو سوا عطرية سوا ريحة سوا زيت و غاتزيد حداه مايد اين موروكو كاتضمن واحد الانتشار واسع حيت الناس لي كايعرفو المغرب اكثر بكثير من لي كايعرفو الجزائر و تونس و باقي دول افريقيا !

ففرانسا بزَاف ديال الجزائريين فاش كايحلّو ريسطورون كايسمّيوه ريسطورون ماروكان حيت المغرب اليوم ولاّ علامة تجارية مشهورة ! فاش غادي منتوج سوا ريسطو سوا عطرية سوا ريحة سوا زيت و غاتزيد حداه مايد اين موروكو كاتضمن واحد الانتشار واسع حيت الناس لي كايعرفو المغرب اكثر بكثير من لي كايعرفو الجزائر و تونس و باقي دول افريقيا !

سهام البارودي- كود//

المغرب نجح فأنه يصنع لراسو علامة تجارية سميتها “المغرب” و حقق واحد الانتشار واسع بزاف فالسنوات الاخيرة اكثر من الاعوام لي فاتو ! فأوروبا مثلا بزاف ديال الناس كاتلاقى معاهم كاتلقاهم فايتين مشاو للمغرب و لي ماعمرو مامشى كاتلقى عندو رغبة يمشي واخا غي مرة وحدة فحياتو يشوف هاد المغرب لي كلشي كايهضر عليه ! و ماشي غير فالسياحة فقط لا ! حتى فبزاف ديال القطاعات فحال الماكلة و التجميل ، ديك النهار شفت بلي الماركة الهولاندية المشهورة ريتيال Rituals  خرجات گام ديال العطور و مواد التجميل سميتها “مگونة” مستوحاة من الورد ديال قلعة مگونة ! و دابا ويليتي كاتمشي غير للسوبر مارشي تقدى العطرية غادي تلقى قريعات ديال العطرية المغربية حدا قريعات ديال العطرية المكسيكسية و ديال البايلا و ديال الهنود … يعني المغرب ولات ماركة تجارية معروفة و عندها مصداقية كبيرة !
ففرانسا معروفة انه الجزائريين فاش كايحلو ريسطورون و باش يضمنو ليه انتشار واسع كايسميوه ريسطورون ماروكان ! يقدرو يديرو فيه الاطباق الجزائرية و لا شاوارما و لا الاطباق المغربية و لا شي اطباق هجينة و لكن السمية كايسميوها على المغرب ! حيت غادي دير ريسطورون الجيريان شكون غايتسوق ليه ؟! شكون كايعرف الماكلة الجزائرية ؟! فيناهوا هاد الگاوري لي غايكون جالس مقابل مع نيتفليكس و غايقول هممم تشهيت ناكل شي ماكلة جزائرية و لا هاد الگاورية لي غاتقتارح على صاحبها يديها يتعشاو فشي ريسطورون جزائري بمناسبة عيد الحب ! ماكايناش هادي ! وسط عشرة د الگور نختاروهم فالزنقة بشكل عشوائي و يكونو من جنسيات مختلفة مريكان، فرانسا، المانيا، اسبانيا، ايطاليا… تسولهم على المغرب غاتلقى الاغلبية كايعرفوه في حين الجزائر مامعروفاش ( من غير ففرانسا لأسباب استعمارية و تاريخية ) و حتى لي كايعرف الجزائر لاسولتيه على المدن الجزائرية غايضرب النح في حين الناس كاتعرف مراكش و فاس و كازا ووارزازات …
المغرب نجح فأنه يخلق لراسو ماركة مسجلة واعرة و خصوصا دابا مع لاكوب ديموند لي فاتت ! ولكن بالمقابل ماكايتمش الاستغلال ديالها بشكل فعّال ! و خصوصا من ناحية المصداقية، كاين بزاف ديال الحوايج لي المغرب خاصّو يقننهم و يخلق فيهم واحد الثورة اقتصادية فحال أرگان المغربي و زيت الزيتون المغربي و العسل المغربي و الزعفران و المنتوجات المغربية التقليدية فحال الجلد ! هادشي راه خاصو يكون مضبوط و كايخضع لشروط انتاج صارمة ماشي عامر غش ! تبغي تشري يطرو ديال العسل خاصك ماهي و ما لونها فين غاتلقاه و شنو هي الضمانة بأنه عسل حر و واش عندو الطابع ديال لونصا ؟! نفس الشيء مع الزيت ! واش حر واش مغشوش ! ارگان، آملو ، الزعفران….. كلشي مغشوش و ماكايناش المراقبة و الصرامة، لدرجة انه باش تشري منتوجات حقيقية و دايزة على المختبر خاصك تكون فأوروبا ! أمّا كمغربي عايش فالمغرب راه عندك احتمال كبير انك تتخور و يدكّو ليك شي خمسة يطرو ديال الزّيت عامرة بزيت المائدة !

موضوعات أخرى

22/04/2024 07:00

قاضي التحقيق بابتدائية سطات هبط موظف سجن عين علي مومن الحبس وها التهم للي توجهات ليه