گود سبور//

عتق المدافع جواد الياميق الناخب الوطني وليد الركراكي، وقدر يماركي هدف الرباح للمنتخب المغربي على البحرين، فـ ماتش أميكال اليوم الخميس فـ فتيران مولاي عبد الله بالرباط.

وكان ماتش المنتخب الوطني المغربي المصنف الـ11 عالميا ومنتخب البحرين المصنف 88 عالميا، غايسالي بنتيجة التعادل السلبي زيرو لزيرو، حيث ما قدروش الأسود يوصلو للشبكة ديال البحرينيين واخا سيطرو على الكورة، ومازال الناخب الوطني وليد الركراكي كايلقى مشكل مع المنتخبات اللي كاترجع له اللور وكادير له لبلوك، ولكن جواد الياميق قدر يخطف هدف الرباح للمنتخب المغربي فـ الدقيقة الآخيرة من الماتش.

بهذا الرباح قدر المنتخب الوطني المغربي، يعادل الرقم  القياسي العالمي اللي عند إسبانيا برصيد 15 رباح متابع، وعندو فرصة يحطمو الماتش الجاي ضد الكونگو.

الماتش ديال المنتخب المغربي ضد البحرين، عرف حضور أقل للجمهور من ماتش المغرب والنيجر اللي كان نيت فـ تيران مولاي عبد الله، ومن الملاحظات هو حضور فرق الفولكول بحال الدقة المراكشية وأحواش، وهذا الشي راه كايطرح علامات استفهام كيفاش هذا الجمهور غايشجع المنتخب باش يربح كاس أفريقيا المقبلة على بعد شهرين ونص من انطلاقتها.