كود الرباط//

تسربت معطيات جديدة حول خلفيات القرار اللي دار مكتب مجلس النواب، فاش وقف تقرير المهمة الاستطلاعية حول صفقات المخيمات الصيفية، وطلب من اللجنة الاستطلاعية تعاود الصياغة، بحيث أكد مصدر “كود” أن المهمة عانت صعوبات كبيرة فاش بغات تكتب تقريرها النهائي.

وأكد مصدر لـ”كود” أن وزارة الشباب والثقافة والتواصل، مبغاتش تعطي الوثائق لأعضاء المهمة الاستطلاعية، واصفا الخطوة بنوع من “التستر” على شبهات تبديد أموال عمومية تخص صفقات المخميات سواء فيما يتعلق بالتغذية أو اللوجستيك والنظافة أو مرافق الاستبقال والخدمات الأخرى.

وعكس عدد من الوزارات، وزارة بنسعيد مبغاتش تعطي الوثائق، وهادشي زاد عقد المهمة الاستطلاعية لي وقفات على اختلالات خطيرة منها تورط سياسيين ومسؤولين نقابيين في عدد من الصفقات.

المصدر كيتساءل :”واش حيث هاد السياسيين من أحزاب التحالف الحكومي خاص يحميهم بنسعيد؟، ولا كيفاش زعما هاد هاد الوزير لي عارف مزيان النقابية الاستقلالية عليها شبهات كثيرة فهاد المارشيات ومقدرش يفرشها ولا على الأقل يحبس النزيف ديال دوك الصفقات، وزيد عليها فين التقرير الاسود لي كيهضر عليه شحال هادي وكيتغنا به فـ”الأوف” للصحافة”.

وكانت “كود” حصلت على وثيقة رسمية تفيد وجود هاد الاختلالات، وبناء عليها تم توجيه مذكرة تنبيهية للمسؤولين الجهويين والإقليميين بوزارة الثقافة والشباب والتواصل.

وافاد مصدر “گود” ان الوزير المهدي بنسعيد توصل ببعض التقارير وطالع على جزء التخلويض لي ف التموين والنظافة وكل ما يتعلق بصفقات التخييم، هادشي قبل اشهر. واش عاقبهم ولا مزال؟.

لكن مصدر بوزارة الثقافة قال لـ”كود” بأن :”المهمة الاستطلاعية عقدت اجتماعات مع مسؤولي الوزارة ومع الوزير شخصيا، واطلعوا على عدد من الوثائق”.

وشدد المصدر بالوزارة لـ”كود” بأن الوزارة طبقت القانون فقط ولا يمكن أن تعطي وثائق سرية لأعضاء المهمة، خوفا من استغلالها في “الابتزاز” أو تسريبها لغايات في نفس يعقوب، مضيفا :”هادي مهمة استطلاعية وليست لجنة تقصي الحقائق باش نعطيوها الوثائق، الإدارة غير ملزمة تعطيها”.

ونفى المصدر بأن تكون الوزارة رفضت التعاون مع البرلمان في هذا الشأن، مذكرا بعدد من اللقاءات التي يجريها بنسعيد مع نواب الأمة داخل البرلمان.

المخيمات ديال الدولة كيستفدو منها اطفال من اسر فقيرة وذات دخل محدود وأبناء الطبقة المتوسطة، ولكن بعض المسؤولين حالفين يطمعو فالمال العام المخصص لهاد الفئة لي خرجات من ازمة كوفيد وتحرمات من الأنشطة والخروج والتبحار.