كود كازا ////

البارح الاثنين 15 ابريل 2024 تعاد افتتاح اوطيل “روايال المنصور” الاصل اي ديال كازا. هاد لوطيل كان تسد ف2015 وتعاود كولو. 8 سنين باش يولي بحالو بحال ديال مراكش. هاد لوطيل معروف فكازا. تبنا فالخمسينات. 

لوطيل الجديد فيه 23 طبقة قليل اللي عندو هاد العدد من ايطاجات فشارع الجيش الملكي فكازا. فيه 149 شامبر وسويت روايال كبير والامور لخرى اللي كتكون فلوطيلات من هاد النوع: پالاص. 

ادارتو خداها فرنسي اسمو جون كلود ميسان. حشومة اوطيل بهاد المستوى يعطيوها لفرنسي. مازال شي وحدين عندهم عقدة الفرنسي. ماشي هما بوحدهم الواعرين فتدبير الفنادق. كاين النگالزة. المثير فهاد الشي هو اللي كشفات عليه “لوديسك”. قالت بللي هاد لفرنساوي كان جدارمي.

لكن المثير فهاد الافتتاح بعد الاصلاح ماشي هو هادا. المثير كيفاش مدينة كلها بحجم كازا سخرات كلشي امكانياتها قبل الافتتاح. يمكن اول مرة فكازا المنطقة كلها اللي حدا لوطيل تغيرات. 

تصورو مجموعة “أكور” دارت فنفس الزنقة. زنقة سيدي بليوط. حقاش اوطيل روايال المنصور كاين فتقاطع شارع الجيش الملكي مع زنقة سيدي بليوط. قلت “اكور” دارت “سوفيتيل. تور بلانش”: 5 نجوم ونوڤوتيل. 4 نجوم و”ايبيس”: 3 نجمات. شي حدا شي وما تبدل والو فديك الزنقة. 

غير قرب تدشين “روايال المنصور” ناض مجلس المدينة ولى خدام عندهم. غير الطرف لقريب من لوطيل كولو. تعاود فالزفت. تغرس النخل. تصبغ الطروطوار. تصورو حتى ديك لبلاصة اللي مقابلة مع سيدي بليوط وفزنقة سيدي بليوط وكانت مغلفة ما عارفينش اش فيها٬ ولات جردة. 
المناطق لقريبة من لوطيل زيانت بزاف. موجدة لافتتاح هاد لوطيل. 

كاين اللي غادي يقول هاد الشي مزيان. المهم وسط كازا كيتقاد. اللا. ماشي مزيان. وسط كازا خاصو يتقاد لكازاوا. للسكان. لكل مستثمر. كيفاش اوطيل واخا يكون پالاص يتعاود ويعاودو معاه حي كولو بشوارعو وزناقيه وجراديه ومستثمرين يجيو من برا او مستثمرين من المغرب ما كيتسوقوش ليهم. شي مسخسخينهم مع الادارات وديك كذبة الشباك الوحيد على قبال الرخص وشي مخليين حداهم الزبل٬ ونهار يوصل روايال المنصور كلشي كيولي فخدمتو. هادي فضيحة واهانة لكل بيضاوي. كازا خاصها تزيان ليه ماشي لكليان هاد لوطيل