هشام أعناجي – كود الرباط //

فضيحة جديدة كتعري واقع التسيّب فـ التعمير فـ العاصمة. بحيث أن لجنة مشتركة مكوّنة من عدد من السلطات والمصالح التقنية، من بينها الوكالة الحضرية للرباط، قررت إغلاق مصحة “أكديطال” فـ حي أكدال، بعدما تبيّن أنها تفتحات واستقبلات مرضى بلا ما تتوفر على شهادة المطابقة القانونية.

المعطيات اللي توصلات بها “كود” كتأكد أن المصحة تفتحات رسميا قبل اشهر، واصلا طلعات بسرعة البرق فمكان لا يصلح تكون فيه مصحة قريب بزاف من ملتقى الطرق ومكاينش باركينغ قبالت المصحة. بدات كتخدم غم أن أشغالها ما كانتش قانونية ومعندهمش كل التراخيص المطلوبة.

اللجنة اللي دارت المعاينة اكتشفت أن المجموعة خالفت المساطر القانونية المرتبطة اساسا بالتراخيص الضرورية ديال المصادقة، وأن الوكالة الحضرية ما قامتش بدورها فـ التتبع، رغم أنها الجهة الأولى المسؤولة على هاد نوع من الترخيص.

مصادر مطّلعة قالت أن هاد الواقعة كشفت شبهة تواطؤ إداري بين أطراف المفروض تراقب وتحمي القانون، مضيفة أنه من الغريب عدم محاسبة الوكالة الحضرية واقسام التعمير فالولاية والجماعة.

الفضيحة كتطرح أسئلة ثقيلة: كيفاش مشروع ضخم بحال “أكديطال” يتحل بلا شهادة المطابقة؟ وفين كانت الوكالة الحضرية وقسم التعمير والسلطة؟.