كود سبور//

نزل الفتح الرياضي للكرة الطائرة بمجموعة من العقوبات على لاعبين بالفريق، حيث كانوا من بين العناصر اللي قررت ما تلعبش مع المنتخب المغربي فماتش الترتيب ضد التشاد فكاس افريقيا بمصر، الشي اللي تسبب فالانسحاب والخسرا ففضيحة كبيرة للفولي المغربي.

ادارة الفتح الرياضي فرع كرة الطائرة فبيان لها، اعتبرت مقاطعة لاعبين المنتخب المغربي للماتش د الترتيب فكوب دافريك تصرف ماشي مسؤول، وأساء لسمعة المملكة المغربية وأكدت انه لا يمكن المساومة على الحس الوطني كيفما كانت الظروف حيث حمل القميص الوطني هو واجب مقدس، وان هذا الشي اللي دار اللاعبين غير مسبوق وفيه مساس بالسمعة والمكانة اللي كتحتلها كرة الطائرة الوطنية وطنيا وقاريا ودوليا، وركز النادي على الدور اللي لعباتو رئيسة الجامعة الملكية المغربية فهاد المكانة اللي وصل لها الفولي المغربي.

وقررت ادارة الفتح الرياضي تعاقب ثلاثة لاعبين فالفريق، من بين لاعبين المنتخب الوطني المغربي اللي قررو يقاطعو ماتش المغرب والتشاد فكوب دافريك، وغتحيد صالير ديال شهر، وما غتزيدهمش فليصارير ديال الشهر خلال الموسم الجاي، وعطاتهم يديرو أعمال ذات منفعة عامة داخل النادي ، وأكدت ادارة الفتح أن اللاعبين بثلاثة نادمين حيث قاطعو ماتش المنتخب فكاس افريقيا وكيطلبو المسامحة على هذا التصرف اللامسؤول.