كود طنجة//

قبل أيام تفجرت فضايح جديدة بطنجة، في ارتباط مع ما يعرف بفضيحة “منير مون بيبي”، والمستشار الخاص للعمدة الذي تم اعتقاله ومحاكمته أدلى لقاضي التحقيق بتصريحات مفاجئة وصادمة.

هاد المستشار الخاص للعمدة، والمدعو حسن المزدوجي، المتابع قضائيا في حالة اعتقال، أكد في التحقيق القضائي أنه كان يسب ويشتم الأمين العام السابق لحزب الأصالة والمعاصرة وزاد أنه يتهمه بالفساد، وهي تصريحات خطيرة جدا من عضو في حزب الپام ضد الأمين العام السابق لهذا الحزب.

هاد التصريحات غادي تزيد تغرّق هاد المستشار الخاص ديال العمدة وغادي تزيد في الإحراج الشديد لقيادة الپام في طنجة جوهريا ووطنيا، خاصة أن الجميع يعرف أن هذه التصريحات  الغرض منها كان فقط التهرب من المساءلة القضائية في مواجهة الصحفيين لي رفعو عليه الدعوى القضائية.

وما كانش فراس هاد المستشار الخاص ديال العمدة أن هاد التصريحات زاد خربق بيها الملف ديالو، وغادي تكون متابعات قضائية أخرى في حقه وغادي تزيد تغرّقو فالحبس.

حكماء حزب الأصالة والمعاصرة بطنجة ما عاجبهمش الحال وغاضبين على العمدة وعلى المستشار الخاص ديالو لي هو عضو الكتابة الإقليمية ديال الحزب، وعبّرو على الاستنكار ديالهم الشديد لهاد التصريحات وعلى التضامن ديالهم مع الأمين العام السابق ديال الحزب لي يعتبر من أكبر المؤسسين ديال الپام.

مصادر “گود” أكدت أن القيادة الجماعية جد محرجة أمام حجم هاد الفضايح ديال الپام فطنجة، وطلبو الاطلاع على وثائق هاد القضية ديال “العمدة مون بيبي” وعلى التصريحات ديال المستشار الخاص ديال العمدة.

دابا فاطمة الزهراء المنصوري خاصها تصدر بلاغ استنكاري وتضامني مع الأمين العام السابق ديال حزب الأصالة والمعاصرة، وخاص  المكتب السياسي ديال الپام يتخذ إجراءات تأديبية في حق هاد المستشار الخاص وفي حق العمدة منير الليموري أيضا، لأن الإساءة ديالهم للأمين العام السابق كانت خطيرة وضررها فادح.

وفي حالة امتناع بنت الباشا عن هاد إصدار هاد البلاغ التضامني فإن الأمر قد يفسر على انه كاين مشكل داخلي، وهو ما يمثل ضربة قاسية لصورة حزب الأصالة والمعاصرة أمام الرأي العام المحلي والوطني.