عن الصباح ///

كشفت يومية “الصباح” فعددها لنهاية الاسبوع ان ناصر بوريطة وزير الخارجية والتعاون الافريقي والمغاربة المقيمين بالخارج رفض فالمجلس الحكومي الاخير ليوم الخميس 27 يناير 2022 الحدود الجوية والبرية والبحرية للمملكة تفتح. 

اليومية قالت ان “قرار الحكومة فتح الأجواء” ما كانش ساهل٬ وانو “ووجه برفض شديد من قبل بوريطة”.

وحسب اليومية فان فان اعلان الناطق الرسمي مصطفى بايتاس فندتو الاسبوعية ان الحسم فالموضوع “تم تأجيله لـ 48 ساعة” يدخل فهاد الرفض البوريطي.

“الصباح” قالت باللي كاع الوزرا كانو مع فتح الحدود الا هاد الوزير وانو “تشدد في استعمال «فيتو» السيادة الصحية في مواجهة الوباء، بذريعة أن الأمن الصحي للمغاربة أهم من فتح الحدود”.

دابا هادا ما وزير صحة ما كيفهم فالصحة وهاد الجايحة وباقي يبقى غير هو اللي كيعطي تصاريح لدخول طائرات خاصة. حقاش مديرية الشؤون القنصلية اللي كيحكم فيها شخصيا هي المكلفة بهاد التراخيص.

طبعا القرار ديال فتح الحدود ابتداء من 7 فبراير نزل فنفس اليوم. جا بعد اعطاء الملك محمد السادس ببسليمان الانطلاقة لتدشين منصات لصناعة اللقاحات ديال كورونا وغيرها نفس النهار. 

دابا هادا وزير مكلف بمغاربة العالم اللي عددهم تقريبا 6 مليون ورافض هادو يدخلو لبلادهم كيفما رافض عودة لمغاربة للي حصلو برا بعد اغلاق الحدود واستمرارو بشكل غبي. 

وزير باغي فلوس هاد لمغاربة. تحويلات مغاربة العالم حسب الحكومة انتقل من 70 مليار درهم ف2020 الى 100 مليار درهم ف2021 وهاد بوريطة باغي يحرمهم من بلادهم من يشوفو عائلاتهم يدفنو حبابهم يرعاو ناسهم يزورو مدنهم.