وكالات//

كشف وزير العدل البريطاني، ديفيد لامي، أن 91 حباس تْطْلْقو بالغلط فـ إنجلترا وويلز من شهر أبريل، وقال بلّي أربعة منهم مازال مطلوقين فالشارع.

وفـ تصريح قدّام مجلس العموم، قال لامي بللي البوليس كيقلبو على ثلاثة ديال الحباسة اللي تْفْرْج عليهم بالغلط، وفنفس الوقت مصلحة السجون كتدير تحقيق على سجين رابع تْطْلْق نهار الاثنين اللي فات.

وأكد الوزير أن هاد الثلاثة ما عندهم حتى علاقة بجرائم جنسية، وشرح أن من بينهم واحد تْطْلْق فـ غشت 2024 وكان مْتورّط فـ المخدرات، وواحد ما رجعش للبوليس فـ دجنبر 2024، والثالث كان محكوم على السرقة بالعنف وتْطْلْق فـ يونيو 2025.

وزير العدل فـ حكومة الظل، روبرت جينريك، انتقد ديفيد لامي بزاف، وقال بللي الطريقة اللي داير بيها الأمور “مهزلة حقيقية”، وحذر بلّي هاد الأخطاء كتعرض الناس للخطر.

لامي من جهتو، رمى اللوم على تخفيض المصاريف اللي دارتها الحكومات اللي قبل، وقال بلّي عدد حراس السجون نقص بحوالي 6 آلاف ما بين 2010 و2017، وهادشي دار تأثير كبير على التجربة ديال الموظفين وزاد الضغط على النظام كامل.