كود الرباط//

فضيحة كبيرة اليوم فمجلس النواب، بطلها الفريق الاستقلالي للوحدة والتعادلية، باش ذكر بالاسم شركة مشبوهة ومولاها عليه شبهات، للضغط على وزير النقل واللوجستيك، محمد عبد الجليل، من أجل التدخل لصالح شركة انتر شيبينغ للنقل البحري.

برلمانية عن الفريق الاستقلالي طرحات الموضوع ديال هاد الشركة وذكراتها بالاسم (وهو ما يخالف النظام الداخلي لمجلس النواب). هادشي ماشي أول مرة بل فمناقشة مشروع قانون المالية بمجلس المستشارين ضغطو المستشارين الاستقلالي على وزير النقل باش يلقا الحل لهاد الشركة وذكروها بالاسم.

وهنا كيطرح السؤال أش علاقة الاستقلال بهاد الشركة، وكيفاش بوحدها كيدافعو عليها.

الوزير جاوبهم بصراحة وفرشهم وقال بلي الشركة التي ذكرت عندها صعوبات مالية واخلت بعدد من الالتزامات فيما يخص اتفاق عطينا ليها حول المياه البحرية بين إسبانيا والمغرب”، مضيفا: “مزال شركة مغربية AML وحنا  كنوجدو لاستقطاب مستثمرين جدد”.

هاد الشركة راها ممنوعة فاسبانيا دبا، ويلا دخلات غايتم الحجز عليها، كيفاش فريق برلماني كيدافع على “اللاقانون” والفوضى فالنقل البحري. من غرائب تضارب المصالح عاين باين فجلسة عمومية.

وتنص المادة 357 من النظام الداخلي لمجلس النواب، أنه يجب على النائبات والنواب أن يعملوا لمصلحة الوطن والمواطنين وعلى إيثار المصلحة العامة على كل مصلحة فئوية أو خاصة وتجنب تضارب المصالح مع مهامهم النيابية وألا يستغلوا مهامهم النيابية لتحقيق مصلحة خاصة أو منفعة مالية أو عينية أو لذويهم.