وكالات//

تعرضو عشرات الآلاف من النسخ الرقمية ديال أوراق ثبوتية ديال السياح للسرقة من السيرڤرات ديال بعض الفنادق فإيطاليا، وولاو كيتباعو فالإنترنت المظلم، حسب ما صرّحات به الهيئة الإيطالية للشؤون الرقمية.

وحسب وكالة “فرانس برس”، الوثائق اللي تسرقات فيها جوازات سفر وبطاقات تعريف شخصية بجودة عالية، كانت كتستعمل فالريسيبسيون باش يسجلو الضياف، والهيئة حذرات من العواقب المالية والقانونية الخطيرة اللي ممكن يتعرضو ليها الضحايا، بحال النصب، التزوير، أو حتى انتحال الهوية.

عدد الوثائق المسروقة تقّدّر بحوالي 100 ألف وثيقة، والاختراقات وقعات ما بين يونيو وغشت 2025، حسب المجموعة اللي دارات الهجوم، واللي كتسمي راسها “ماي دوكس”.

السلطات قالت بلي لحد الساعة الهجوم طال 10 ديال الفنادق، ولكن ما تستبعدش يبانُو حالات خرا فالقريب.