كود كازا ///

علمت “كود” ان التحقيقات فالسطو والسرقة على 500 تلفون من نوع سامسونگ فمطار محمد الخامس فكازا شملات عدد كبير من الحمالة. وفق مصادر “كود” تشد لحد الان كثر من 20 شخص.

لفضيحة لكبيرة والشوهة العالمية للمغرب بدات باش رسل شي تاجر 1500 تلفون اخر صيحة من الماركة الكورية من دبي لدكار. الرحلة دارتها الخطوط الملكية المغربية. كان ايسكال فمطار محمد الخامس. باش وصلات السلعة لداكار٬ تضيف مصادر “كود”٬ تم اكتشاف باللي 500 تلفون اختفت. تشفرات.

وفق مصادر “كود” باش ريكلاما التاجر ل”لارام” دارت فيه وقالت ليه ما عندنا علاقة. وباللي الشركة غير وصلات الشحنة وصافي. لفضيحة فبلادنا بدات باش تفتح كثر من 200 تلفون فمناطق كثيرة فالمغرب. ديك الساعة احتج مول الشحنة. بدات التحقيقات. دابا تم اعتقال كثر من 20 حمال كيخدم فلارام والرقم مرشح للارتفاع تؤكد مصادر “كود”.

وفق مصادر “كود” فهاد الحمالة كانو خزنو التلفونات وكيخرجو بشوية بشوية بعد ما كيلصقوهم على لحمهم.

كيفاش وصل هاد المطار لهاد الدرجة من التسيب. علاش اجهزة فالمطار كترفض لحد الان تكون كاميرات فليبيست. كلشي كيتشكى من خدماتو الكارثية