وكالات//

القضاء فالأرجنتين كايحقق فوفاة 87 مريض فمستشفيات مختلفة فالبلاد، بسباب تناولهم فنتانيل طبي ملوث ببكتيريا.

الإدارة الوطنية الأرجنتينية للأدوية والأغذية والتكنولوجيات الطبية (Anmat) قدّمت شكاية من بعد ما واحد المستشفى لقا بكتيريا “كليبسيلا نيومونيا” و”رالستونيا بيكيتي” فالفنتانيل الطبي، اللي هو مادة أفيونية كاتتعطى للمرضى.

هاد الوفيات تسجلات فمستشفيات فمقاطعة بوينس أيرس، سانتا في (الوسط)، فورموزا (الشمال الشرقي)، وكوردوبا (الوسط)، حسب ما قال القاضي إرنستو كريبلاك اللي مكلف بالقضية، لجريدة “لا ناسيون” فمقال تنشر نهار الأربعاء.

وحسب نفس المقال، كاينين على الأقل 24 واحد تستنطقو، من بينهم أرييل فورفارو غارسيا، مالك شركتي “إتش إل بي فارما” و”لابوراتوريوس رامايو” اللي كايشكو فيهم أنهم هما اللي صنعو وباعو الفنتانيل الملوث.

التقارير كاتقول أن خمس شحنات ملوثة توزعات على ثمانية مستشفيات ومراكز صحية فمناطق مختلفة فالبلاد.

قبل جوج سيمانات، عائلات مرضى ماتوا تظاهرو قدّام المستشفى الإيطالي فـ”لا بلاتا”، اللي كاتبعد 60 كيلومتر جنوب بوينس أيرس، وكايطالبو “بالعدالة لضحايا الفنتانيل”.

وجريدة “لا ناسيون” نقلات عن خبراء أن عدد الوفيات المرتبطة بهاذ التلوث الجرثومي ممكن يتبدل ملي غادي يراجعو السجلات الطبية ديال المرضى اللي توفاو.

الفنتانيل هو مسكّن أفيوني قوي بزاف، وكايستعملوه طبيا باش يخففو الآلام القوية، بحال ديال مرضى السرطان أو بعد العمليات الجراحية.