الرئيسية > تبركيك > فضيحة. رشوة لصحافيين ومدونين من الصحرا فكرانس مونتانا باش يكتبو زوين. همشو الصحافيين دالصحرا المزيانين وجابو شي مطبلين من اوربا وأفريقيا
17/03/2019 12:47 تبركيك

فضيحة. رشوة لصحافيين ومدونين من الصحرا فكرانس مونتانا باش يكتبو زوين. همشو الصحافيين دالصحرا المزيانين وجابو شي مطبلين من اوربا وأفريقيا

فضيحة. رشوة لصحافيين ومدونين من الصحرا فكرانس مونتانا باش يكتبو زوين. همشو الصحافيين دالصحرا المزيانين وجابو شي مطبلين من اوربا وأفريقيا

علي الصافي -كود- الداخلة ////

فضيحة ما بعدها فضيحة فكرانس مونتانا لي كيدار للمرة الخامسة على التوالي. كلشي فهاد لبلاد كيسهر ويعطي لي فجهدو باش ينجحو ويدوزو بخير وعلى خير لأنه منتدى كيعكس صورة لبلاد وكيدار في إطار الترويج للوحدة الترابية للمملكة، ولكن دائما كاينة فئة ماسوقهاش فصورة لبلاد ولا فالدفاع عن الوحدة الترابية للمملكة.

هادشي هو لي واقع مع هادوك اللي لقاوها باردة ما هازين ما حاطين وكيتبودرو زايدين فيه بحال الى كرانس مونتانا وارثينو . لبواط دكومينيكاسيون لي واخدة راحتها فكرانس مونتانا ناصت جابت صحافيين من شمال أوروبا ومن عمق إفريقيا وخاسرة عليهوم فلوس بالملايين. وخلات الصحافة الحقيقية ديال الصحرا. الصحافة لي فالفوهة ديال المدفع وحاضرة فالتيران وناضت جابت ليست من راسها كلها مدونين ما عندهوم دور وبعض الصحافيين. وحتى فاش جابتهم قالت ليهوم خلصو على ريوسكم التنقل لمدينة الداخلة واها كاين خط جوي بين العيون والداخلة.

كرانس مونتانا هاد العام ما كان عندو حتى اشعاع فالصحرا وبحال إلى ما كاين كاع بسباب هاد السياسة الفاشلة ديال التواصل لي استعملاتها هاديك خيتنا مولات لبواط دكومينيكاسيون، لي مشات جابت هاد المدونون لي ماعندهوم علاقة وبعض الصحافيين لي حتى إسمهم ما عرفناه. وهاشي بان حتى فالتغطية ديالهم الكارثية كيدوزو خبار ديال لاماب.

علاش ما تكونش الصحافة الحقيقية ديال الصحرا حاضرة ولا خايفين منها تنقل الكوارث لي كديرو. هادا راه سميتو استهداف للإعلام المحلي وتحقير من موقعو كأول مدافع عن الوحدة الترابية للمملكة. علاش جبتو ناس ما عندها علاقة من بلايص ما عندهوم علاقة وكتقولو بأنهم صحراويين وإعلام من العيون ومن السمارة ومن بوجدور. الصحافة الحقيقية ماشي هي هاديك لي جبتو . الصحافة الحقيقة مغروفة وعندها ايم وكتخدم بعز وأتفة ووطنية وما كاتساين منكم والو.

وبخصوص مسألة أنفة والعز علمت “كود” أن كاينة واحد لا ليست فيها عشرين واحد من بينهم منتحلين ديال الصفة دخلات المسؤولة على لبواط دكومينيكاسيون على خطهم وقالت ليهم ديرو لي ليست باش دور معاهوم بلفلوس. وهادشي ماشي قانوني لأنها تعتبر رشوة مقابل خدمة داروها وهي أنهم صخافيين من الصحراء على الرغم من أن نسبة منهم ماشي صحافي وما عندوش ملائمة وماعندوش سيت وحتى البطاقة ما عندو، وماشي من العيون.هاد الشي يالله خرجات وزارة الاتصال وقالت غادية دير متابعة

هادشي خاص يتوضع ليه حد وهاد المهزلة خاصها توقف راه شوهات الصحافة الحقيقية فالعيون. وبنادم ولا شاد راسو بسباب هاد الناس لي جابو لكرانس مونتانا وتا فائدة ما قدموها وماشي ناس المنطقة وكل واحد معروف منين جاي وأجندة شكون كيخدم.

يالله خدمي نتي يالداخلية وتقاتلي يالخارجية وأمنو المنتدى يالبوليس وتجيكوم هاد لبواط دير ليكم هاد الشوهة.

واش ما فهموش خطاب الملك اللي هدر على مشكلة الشباب فأفريقيا فهاد المنتدى؟

موضوعات أخرى