اسماء غربي – كود//

وجهات النيابة العامة الفرنسية لمكافحة الإرهاب، البارح الجمعة 11 أبريل، تهم لثلاثة د الجزائريين ، واخد منهم خدام فالقنصلية الجزائرية بفرنسا، على خلفية تورطهم فاختطاف واحتجاز المعارض امير ديزاد فأبريل 2024.

وقالت وكالة الأنباء الفرنسية ان المتهمين ومن بعد التحقيقات تم اتهامهم رسميا بالتوقيف والخطف والاحتجاز التعسفي والمشاركة فتنظيم إرهابي إجرامي. وامرات قاضية مختصة بإيداعهم فالحبس الاحتياطي، على ما تسالي التحقيقات.

امير ديزاد، مؤثر معارض لنظام العسكر وفسادو، وداكشي علاش حصل على وضع لاجئ ففرنسا. ورفضت السلطات دفرنسا بزاف دالمرات تسلمو للجزائر.

وحسب “لوباريزيان” هادشي وقع نهار 29 أبريل 2024، جوج رجال دارو راسهم بوليس دفرنسا وقالو ليه غايديوه لأمستردام باش يتلاقى مسؤول جزائري.

وبعدما دروگاوه، لقى راسو غغابة فالخلا،  نجا من محاولة اغتيال، بعدما فشلات الخطة لأسباب مالية وفنية.