كود هناء ابو علي ////

هاد ليام خرج فيديو لمحامي من هيئة مراكش فطونوبيلة البوليس تصور وهو ماشي فوعيو. مسخن مزيان. فيه سب وقذف. المحامي دابا متابع فحالة اعتقال وهيأة الجنحي التلبسي بالمدينة متابعاه بتهم السكر العلني واحداث ضوضاء واهانة موظفين عموميين اثناء قيامهم بواجبهم والاساءة للدين الاسلامي بسب الذات الالهية والاساءة لمؤسسة دستورية. 

ماشي التهم اللي مشكلة. المشكل هو الفيديو اللي تسجل فطونوبيلة البوليس ومن بعد تسرب. فيه ادانة اخرى لهاد المحامي فالمجتمع. وهاد الشي خطير.

يقدر الامن يسجل فيديو يقدمو للنيابة العامة يعزز مبررات ايقافو. يعني انو كيكون فيد النيابة العامة وهاد الاخيرة خاصها تكون حريصة باش ما يتسربش الفيديو. تسريبو راه ضرب لدولة الحق والقانون. راه ماشي ادانة للمحامي لانو اصلا ماشي فوعيو. 

النيابة العامة سكتات وما خرجاتش ببيان تقول لينا راه تفتح تحقيق فموضوع التسريب وباللي اللي فرط يكرط واللي خطأ يودي. اللا. شفنا الادارة العامة الامن الوطني دارت مبادرة ودارت تحقيق داخلي. من حقها طبعا. لكن القضية كبر من هاد الشي. المتهم راه مازال بريء وباش يكون فحالة اعتقال عندو ضمانات كثيرة. 

هادي قضية حقوقية مهمة بزاف. فيها المحامي المواطن والنيابة العامة اللي من المفروض دور اعضاءها الدفاع عن الصالح العام. راه هاد الاعضاء عندهم “هو “دور فعال في الإجراءات الجنائية، بما في ذلك بدء الملاحقة القضائية، والاضطلاع، ضمن ما يسمح به القانون أو يتمشى مع الممارسة المحلية، بالتحقيق في الجرائم والإشراف على قانونية التحقيقات، والإشراف على تنفيذ قرارات المحاكم، وممارسة مهامهم الأخرى باعتبارهم ممثلين للصالح العام”.

فهاد الحالة كان مس بحياة هاد المحامي. تسريب الفيديو راه يقدر يكلفو غاليا فالمجتمع بلا ما نهدرو على المحاكمة وووو. 

المجلس الوطني لحقوق الانسان دار باش “يتولى النظر في جميع القضايا المتعلقة بالدفاع عن حقوق الإنسان والحريات وحمايتها وضمان ممارستها الكاملة والنهوض بها وصيانة كرامة وحقوق وحريات المواطنات والمواطنين، أفرادا وجماعات، وذلك في إطار الحرص التام على احترام المرجعيات الوطنية والكونية في هذا المجال”. فهاد الحالة ما تحتارماتش لا المرجعيات الوطنية ولا المرجعيات الكونية لحقوق الانسان
بهاد التسريب راه كان من المفروض يكون المحامي فدارو. دابا حتى الجمعيات الحقوقية كتخدم بانتقائية. تحولات لجمعيات ضد النظام عوض ان تكون جمعيات حقوقية تدافع عن تطبيق القانون. مع هاد التوجه قضايا بحال تسريب فيديو محامي مراكش ما كتبقاش موضوع حقوقي عندهم. 

دابا خاص التحرك لارجاع هبة القانون فهاد القضية.