وكالات//

هزات القصة ديال واحد الاعتداء الجنسي لي وقع لخمسة ديال التلامذ صغار، فالمستوى ديال “كي جي 2” (روض الأطفال)، من طرف أربعة خدّامة فواحد المدرسة عالمية فمدينة العبور فمصر، (هزات) الرأي العام المحلي. هادشي خلى وزارة التعليم تتكلف بالإشراف على المدرسة.

أصل القصة كيرجع للشكايات والبلاغات لي وصلات للسلطات المصرية، من عند واليديّن التلامذ لي ما فايتاش عمارهم 5 سنين، كيقولو باللي ولادهم تعرضوا للتحرش والاعتداء الجنسي فواحد الغرف داخل مدرسة “سيدز” الدولية.

دغيا، وزارة الداخلية فتحات تحقيقات موسّعة فهاد البلاغات، وسمعات الأقوال ديال دوك الخمسة ديال التلامذ لي قالو كلام صادم على داكشي لي وقع ليهم فالمدرسة. ديك الساعة، البوليس دارو حملات دغيا باش تلقي القبض على المتهمين، وفعلاً شدوهم.

حسب التحقيقات، واحد من المتهمين دار موس على عنق طفلة تعرضات للاعتداء الجنسي، وهددها بالذبح إيلا هدرات على داكشي لي وقع ليها. بينما أكد طفل آخر باللي العامل لي اعتدى عليه خنْقو من عنقو وهددو بالقتل إيلا قال لشي حد على داكشي لي وقع معاه.