كود الرباط//

الكوبل الحكومي محيح هاد الايام، وزيرة الأسرة والتضامن عواطف حيار حالفا حتى تدي راجلها للأمم المتحدة، اييه راجلها “سوبر مستشار” بالوزارة اللي كيبان أقوى من الكاتب العام.

الفضيحة هي أن هاد الكوبل الحكومي ديما لاصقين فبعضياتهم، وفين ما مشات الوزيرة راجلها تابعها، فالبرلمان والمنتديات وزيد زيد.. الفضيحة هي داتو لمؤتمر فنيويوك على المرا.

هاد التسافيرة جات مع 8 مارس بمناسبة جلسة نقاش مفتوحة للهيئة التنفيذية للأمم المتحدة حول موضوع “المرأة والسلام والأمن”، فنيويورك.

وقال مسؤول قسم التواصل بالوزارة في اتصال مع “كود”: “معنديش نفي أو تأكيد سفر زوج حيار رفقة الوفد المغربي المشارك في جلسة النقاش المفتوحة للهيئة التنفيذية للأمم المتحدة”.

ولكن مصدر داخل قسم التواصل أكد لـ”كود” بلي مسؤول قسم التواصل على علم بسفر زوج حيار وكان فتواصل دائم معه.

يشار بلي زوج الوزيرة حيار أثار الكثير من الجدل بعدما بغات الوزيرة ديرو مدير الديوان، وفاش تسربات الخبار على الراجل وتراجعت الوزيرة على تعيينو ، قبل ما يرجع عاوتاني للوزارة عبر مستشار “نافذ” بدون منصب مالي.

الوزيرة كتقوليهم راجلي كيتعاون معايا ومكيتخلصش، ولكن السفريات وتعويضات السفريات كياخدها طبعا.