گود سبور//
تفرگعت فضيحة جديدة يشتبه أن السويسري جياني إنفانتينو رئيس الاتحاد الدولي لكرة القدم، طايح فيها حسب ما نشرت شبكة RMC الفرنسية نقلا عن “التايمز” البريطانية، واللي كشفت فتحقيق لها على أن الاتحاد الدولي لكرة القدم (فيفا) ما ديكلاراش بصالير ثاني كايشدو الرئيس ديالو إنفانتينو، واصل لملايين الأورو، شدو فالسنوات الأخيرة، وأنه كان كايتخلص 2 صاليرات منفاصلين ما بين 2024 و2026، واحد كايدوزوه الفيفا فسويسرا وداخل فالتقرير السنوي، وواحد كاتدوزو الشركة المنظمة لكأس العالم فالميريكان، وهذا الصالير هو اللي ما مديكلاريش.
وقالت “التايمز” إن التقرير السنوي للفيفا كشف أن إنفانتينو شد 4.274 مليون فرنك سويسري (4.59 مليون يورو) فعام 2024. ولكن الإقرار المالي اللي تعطى لمصلحة الضرائب الأمريكية من طرف الشركة اللي تأسست لتنظيم كأس العالم، كشف أن إنفانتينو خدا مبلغ إضافي بتقريبا 1.76 مليون دولار (1.89 مليون يورو) وهو المبلغ اللي ما علنوش عليه الفيفا فتقريرهم السنوي، وكاتقول مصادر “التايمز” إن إنفانتينو خدا مبلغ بحالو، وأكثر كاع ما بين 2025 و2026، وأن هاذ الشي يعتبر انتهاك للوائه الفيفا، وتحديداً المادة 43، الفقرة 13 (اللي كاتنص على ضرورة الإعلان عن الأجر الفردي لرئيس الفيفا وأعضاء المجلس والأمين العام للفيفا).
المصادر اللي نقلت عنها جريدة “التايمز” شاكين أن هذه الأموال المخفية توظفت لتمويل فيلا فاخرة أقام سكن فيها إنفانتينو وعائلتو فميامي بعد كأس العالم 2022، وكاينة هذه الفيلا فحي “صن ست آيلاندز” (Sunset Islands) الفاخر بزاف، وهي مملوكة للملياردير إريك شميدت، الرئيس التنفيذي السابق لشركة “گوگل”، اللي كان شراها بأكثر من 24 مليون أورو عام 2023.
التحقيق اللي دارتو جريدة “التايمز” هضر حتى على عملية مالية أخرى مشبوهة لإنفانتينو، واللي شرا بها برطمة فاخرة فحي آخر من أحياء ميامي فأكتوبر 2025 من مغني السالسا مارك أنتوني، اللي كان تعين سفير لكأس العالم عن مدينة ميامي قبل هذا الشي بأربعة أشهر، أي فشهر يونيو، وخلق سعر البيع (7,7 مليون اورو) استغراب كبير بزاف عند المتخصصين فسوق العقارات، حيث المغني المذكور تكبد خسارة قدرها 2,1 مليون أورو مقارنة بالسعر اللي خلص (9,8 مليون يورو) باش يشري العقار عام 2021.
وكاتجي هذه الفضيحة الجديدة، فالوقت اللي كايجمع فيه انفانتينو أصوات داعمة له للبقاء على رئاسة الاتحاد الدولي لكرة القدم، وهي الرئاسة اللي مرشح لولاية ثالثة فيها خلال الانتخابات اللي غادي تكون فالمغرب شهر مارس 2027.