كود سبور//

تفرگعت فضيحة جديدة فالسنغال وتاني بطلها الاتحاد السنغالي لكرة القدم والمنتخب ديالو.

هذه المرة القضية عندها علاقة بالسحر والشعوذة، وكشف الصحافي الاستقصائي رومان مولينا، أن الاتحاد السنغالي جاوب معهم 17 سحار ومشعوذ ضمن وفد منتخب السنغال المشارك فكاس أفريقيا “المغرب2025”.

هاد 17 واحد هما وحدين كايقولو لهم “مارابوت” هما زعمة معالجين روحانيين، وگلسو كايصاوبو “الجيريجري” وهادو هما الحجبات وطلاسم السحر والشعوذة ومعروفين فإفريقيا جنوب الصحرا وغربها وعندها علاقة بالسحر الأسود والفودو باش كايجيبو زعم الحظ ويأيدو الخصوم ديالهم حسب معتقداتهم المتخلفة فكريا وثقافيا وعلميا.

طبعا هاد الطقوس كاتبقى تخربيق وخرافات، وكون كانت تنفع كون السنغال شابعين ألقاب فكاس افريقيا ورابحين كاس العالم، وهما اول كوب دافريك تسناو حتى لعام 2021 باش قدرو يربحوه حتى وجدو منتخب مزيان، اما كاس العالم راه كايطيرو من الأدوار الاولى وهذا الشي اللي كان عليه الحال فمونديال 2026 ملي تقصاو من دور 32.