وكالات//

مات شيفور طوموبيل تسلا موديل 3 فواحد الحادث مأسوي فمدينة نورث ميامي بيتش، منين شعلات العافية فالطوموبيل وما قدروش البومبية يخرجوه منها، وهادشي رجّع النقاش على السلامة ومقابض الباب لي مخبيين فطوموبيلات تسلا.

حسب التقارير، الحادث وقع من بعد الربعة دالعشية فنهار الأربعاء، ملي كانت الطوموبيل كتسير فالطريق ديال نورث ويست 163، حتى خرجات ليها طوموبيل أخرى، وضربات تسلا فواحد العمود ديال الضو وشعلات العافية فيها مباشرة.

قال المتحدث باسم شرطة نورث ميامي بيتش، كوري داردن، أن البوليس وصلو بالزربة لمكان الحادث، ولكن ما قدروش يوصلو للشيفور قبل ما تخرج العافية على السيطرة. كاين شخص آخر تنقل للمستشفى، ولكن الحالة ديالو أو الدور ديالو فالحادث ما معروفينش، وسباب الحريق باقي ما معروفش حتى هو.

فواحد الفيديو تصوّر من البلاصة اللي وقعت فيها الحادثة، باينين البوليس كيجربو يطفيّو العافية بطفايات العافية، وكيحاولو يهرسو جاجة من الجوانب ديال الطوموبيل، ولكن واحد الشاهد قال بللي هادشي “ما دار حتى نتيجة”، وخلاو المهمة للوقاية المدنية حيت كانو خايفين تنفجر الطوموبيل، حسب جريدة ميامي هيرالد.

هاد الحادث وقع غير سيمانة من بعد حادث مشابه ف ألمانيا، مات فيه شيفور طوموبيل تسلا موديل S وجوج دراري صغار، منين خرجات الطوموبيل على الطريق وشعلات فيها العافية، وحتى واحد من الشهود ما قدر يحل الباب باش ينقذ الركاب قبل ما تاكلها العافية.

وتسلا كتعاني بزاف من الانتقادات بسبب صعوبة فتح البيبان منين توقع شي حادثة. الشركة اعترفت بالمشكل، وقالت بللي خدامة على واحد التصميم جديد لي كيخلط بين الفتح اليدوي والإلكتروني فزر واحد.